شەفەق نیوز/ شارەزایگ کەشناسی، ئمڕوو سێشەممە، هوشداری دا ک عراق کەفێدە وەر واران رفتیگ لە ئەنجام پەڵەی کەشوهەوا ک ئەمشەو رەسێدە وڵاتەگە، و داوا لە حکومەت عراقی کرد دەوام فەرمی پەک بخەێد تا رویداو نەکەفێد.
عەلی جایر زیادی شارەزای کەشناسی ئەرا ئاژانس شەفەق نیوز وت: وڵاتەگە ئمشەو کەفێدە وەر پەڵەی وارانی بەرزیگ، هەر لە بەشەیل خوەرئاوایی دەسوەپی کەێد و ئەرا شەفەق یا شەوەکی زوی، و وەرەو شارەیل کەفێدە جویلە، و وەرووژ قویلەو بوود ک واران ناوڕاسیگ وارێد و لە چەن ناوچەیگ لە ئەنبار و فورات ناوڕاس و بەشەیلیگ لە ناوڕاس وڵاتەگە رفتە.
زیادی وتیش: وارانەگە تا شەفەق رووژ پەنجشەممە وەردەوامە و مەزەنە کرد وارانەگە لە باکوور وڵاتەگە کەمتر بوود، و وەرەو باشوور ناوڕاس بوود و لە بەشیگ لە بیاوان باشوور رفت بوود، و هەمیش داوەزین لە پلەی گەرمی ئەرا سوو چوارشەممە هەس، و لە رووژ پەنجشەممە سەردترەو بوود.
زیادی داوا لە حکومەت کرد دەوام مەکتەوەیل لە بەشیگ لە شارەیل ناوڕاس و خوەرئاوا بوەسێد لەوەر وارانە رفتەگە لە سوو چوارشەممە تا رویداویگ نەکەفێد.