شەفەق نیوز/ وەڕیەوبەرایەتی پولیس پارێزگای سلێمانی، ئمڕوو یەکشەممە، خەوەردا لە دەسگیرکردن چوار کەس ک نیاز داشتنە لەمەوقەی تاقیکردنەوەیل گشتی قۆپیە بکەن.
وەڕێەوبەرایەتیەگە لەبەیاننامەیگ رەسیە ئاژانس شەفەق نیوز راگەیان، لەدویای جەمەوکردن زانیاری و وەدویاچگن ئەرا چەن توومەتباریگ ک نیاز داشتنە وە ئامێر بیتەل و مۆبایل لە تاقیکردنەوەیل گشتی قۆپیە بکەن، دویای وەرگردن بڕیار دادوەر چوار توومەتبار وەلایەن مەفرەزەیلیانەو دەسگیر کریان.
مەوقەی دەسگیرکردن دەسنریاسە وەبان دوو ئامێر بێتەل و مۆبایل، و چەن کەلوپەلیگ ترەک و ماشینیگ ک توومەتبارەیل نیاز داشتنە ئەرا قۆپیەکردن وەکاری بارن.
راگەیانیش، وەبڕیار دادوەر توومەتبارەیل گیریانە و لێکۆلینەوە وەگەردیان وەردەوامە.