عەتیە لە پۆستیگ لەبان فەیسبووک نویسان: لە بنەمای وینەیل مانگە دەسکردەیل لە نیمەڕو چوارشەممە، ئیرنگە واران و ئەور و تریشقە لە قەزای روتبە هەس، و ئەوەسا وەی شەوە رەسێدە ناوچەیلیگ لە ئەنبار.
وتیش: ئەرا سوو شەوەکی لە ناوچەیل نەینەوا وەگەرد ئەنبار واران وارێد وەگەرد تریشقە و گرمەهڕ، و دیاری کرد ک خەسی وارانەگە وەماوەی ساعەتەیل ئیوارە و شەو پەنجشەممە لە شارەیل ئەنبار و نەینەوا و سەڵاحەدین و دهۆک و هەولێر و کەرکوک و دیالە زیای بوود، و لە رووژ جمعە شارەیل دهۆک و هەولێر و سلێمانی و بیاوان سەماوە بوودە تریشقە و گرمەهڕ وەگەرد وارانیگ جاروبار رفتەو بوود.
عەتیە مەزەنەی واران سووکیگ لە دیالە و نەینەوا و سەڵاحەدین و کەرکوک و ناسریە کرد.
وتیش؛ مەزەنە کریاگە خوەڵوتووز خەسیگ لە باکوور خوەرئاوای ئەنبار ئەرا ئیوارەی پەنجشەممە دروس بوود، و لە شەو وەرەو خوەرهوڵات ئەنبار و سەڵاحەدین تەکان خوەێد، ئیجا وەرەو بەغداد پایتەخت ئمجا ئەرا شارەیل فورات ناوڕاس وەرجەیەگ سووکەو بوود و وەرەو باشوور وڵاتەگە بچوود.
عەتیە وتیش: گشت شارەیل وڵاتەگە لە سوو پەنجشەممەو ئەور وەخوەیان دوینن، تا کەشوهەوا بوودە ناوبەین نیمچە ئەورە تا ئەور تەواو، وەیجویرە نووڕین مانگ وە چەو یا وە هەر شیوەیگ سەختەو بوود.