شەفەق نیوز/ ئەندام ناودیاریگ لە دەسەی ئاسایش و وەرگری لە پەرلەمان عراق، ئمڕوو پەنجشەممە، ئاشکرای هەسی لایەنەیلیگ کرد چزدان خاوەن رفیایەگان لە پارێزگای ئەنبار کەن، گوایە کوڕەیلیان تێرنەو، و دیاریکرد ک باوەت رفیایەگان رەسیە ری بەسیاگیگ.

ئەو پەرلەمانتارە ک خوازێد ناوی ئاشکرا نەوود، ئەرا ئاژانس شەفەق نیوز وت: هەنای لە ئەنبار وەرپرسیگ خۆجێی بویم، دەسەیلیگ لە هەواڵگری و ئەمن نیشتمانی و وەرپرسەیل کەرتە ئیداریەگان دروس کریا، ئەوەیش وە رینمای حەیدەر عبادی سەرۆک وەزیران وەرین، و لەو وەختەو رەسیمنە رییگ بەسیاگ، و تا ئیسە نێزانیمن کی هالە پشت ئی رفناننەیەلە.

پەرلەمانتارەگە دیاریکرد ک تا ئیسە کەسوکارەیل رفیایەگان وەگەرد حکومەتەیل خۆجێییان مینەی هەر خەوەریگ لە چارەنووسیان کەن.

پەرلەمانتارەگە باس پیاوەگ لە هووز بونمر کرد، ک ٥ کوڕی رفیاگە، و ئەندامەیل یەکیگ لە میلیشیاگان ک چەن شوونیگ لە پارێزگاگان کۆنتڕۆڵ کردگە هاتن و داوای ٥٠ هەزار دۆلار لەلی کردن، تا کوڕەگانی مەرەقەز بکریەن، و وەرجە دوو رووژ یەکیگ لە خاوەن قوربانیەگانیان وەمن وت؛ هێزیگ چەکدار باس لە مەرەقەزکردن براگانی وەرانوەر ٦٠ هەزار دۆلار کرد.

پەرلەمانتارەگە دیاریکرد ک لایەنە بڕفەگە سەروە دەوڵەتە و هالە گشت شوونیگ، بەڵکم حکومەت توانای کردنەوەی باوەتەگەی نەیرێد.

وباس لە ئومید خوەی کرد ک حکومەت وەهێزیگ باێد بتوێتێد بڕەسێدە ئەو شوونەیلە ک شایەت رفیایەگان لەناویان بوون.