شەفەق نیوز/ لیوا یەحیا رەسول قسەکەر هێزە چەکدارەیل، ئمڕوو شەممە، راگەیان: ناوەندەیل هەماهەنگی هاوبەش لەناونی هێزەیل فیدڕاڵی و هێزەیل پێشمەرگە، کەفێدە سەرپەرشتیاری موستەفا کازمی سەرۆک وەزیران.

رەسول لە کۆنگرەیگ رۆژنامەوانی ئمڕوو وت: جیماگەیل داعش لە شانە خەفتگەیلن، و وەشیوەی مەفرەزیلیگ لە ٥ و ٦ کەس ژیروەژیر کار کەن، یا چنە ناو بیاوانەیل وناوچە سەختیەیل لەناو کوێەیلە.

قسەکەرە سەربازیەگە وتیش؛ لە ئۆپراسیۆنەیل دژوە داعش لە یەک مانگ ئایار تا ٢١ خود مانگەگە دەس نریاسە بان ٢٠٢ بومب و ٩٦٣ چەک، و زیاتر لە ٢٠ ئەندام ریخریاگ داعش کوشیاگە، و هیمان ئۆپراسیۆنەیل لە گشت کەرتەیل سەربازی وەردەوامن.

دەربارەی هەماهەنگی هاوبەش ناوبەین سوپای عراق و پێشمەرگە، لیوا یەحیا رەسول وت: ئی ناوەندەیلە ئەوەسا کەفنە ژیر سەرپەرشتیاری سوپا، و نۆێنەرەیل لە گشت چینەیل هێزەیل عراق کەفنە ناوی، و دووپات کرد ک ئەو ناوەندەیلە وە فەرمان فەرماندەی گشتی هێزە چەکدارەیل کار کەن.

وتیش؛ کار ئی ناوەندەیلە بوودە تەنیا هەماهەنگی  لەناونی گشت کەرتەیل، و هەمیش هەماهەنگی ئۆپراسیۆنەیل دژوە چەتە تیرۆریەیل داعش، و گردەوکردن زانیاریە هەواڵیەیل.