شەفەق نیوز/ وازکردن دوکانیگ ئەرا فرووشتن مەی لە قەزای قائیم لەپارێزگای ئەنبار، تویڕەیی لەلای بڕیگ لە ئیمام وخەتیب مزگەفتەیل شارەگە دروس کرد، ک هیشت بڕیار وسیان نماز جمعە بیەن، تا ئەوەنە ئەو دوکانە بەسیەێد.   

"ئەنجومەن فەتوای قازای قائیم"، ئمڕوو پەنجشەممە، فتوای وسیان نماز جمعە لە مزگەفتەیل قائیم دەرکرد، تا وەختیگ ئی دوکانە بوەسیەێد. 

لەلای خوەییش،  عەمار فەخری وەرپرس وەقف سونی لە قائیم رینمای جیوەجیکردن نماز جمعە دا لە گشت مزگەفتەیک قەزای قائیم ورومانە، و جەخت کرد ک وسیان نماز جمعە نییە، وهەرکەس پێشێلکاری بکەێد وەرپرسایەتی یاسایی هەڵگرێد.  

ئەحمەد محەلاوی قایمقام قائیم ئۊشێد: دوکانەگە وە مووڵەت پارێزگار ئەنبار واز بویە، ولەلای دەزگای گەشتوگوزاری مووڵەت دیرێد، وشوینەگەی ها دەیشت سنوور ئیدارەی شارەگە، ودووپات کرد ک جویر ئیدارەی قەزاگە مووڵەت وازکردن دوکانەگە نەیایمنە، تا دویر لە ناکۆکیەلیگ وەگەرد هەر لایەنێگ بکەفیمن.  

محەلاوی ئەرا ئاژانس شەفەق نیوز وت: بەشیگ لە ئیمام وخەتیبەیل قائیم هەس باس لە نیاز وسانن نماز جمعە کردنە تا ئەوەنە ئەو دوکانە بەسیەێد، ک هیشت قسە وەردیان بکەیمن وهوشداریان لەیجویر کارەیلیگ بکەیمن، وتیش: ئەوەگ رازی وە وازکردن ئی دوکانە نییە توەنێد تەنیا لەبان مەنبەر مزگەفتەیل شەرمەزار ئی کارە بکەێد.  

لە کۆتایی قسەیلی هەڕەشە ئەوە دا ک هەرکەس  تەقەلای وسانن نماز جمعە لەوەر هەر چشتیگ دەێد، ئیمە رەفتاریگتر وەگەردی دیریمن.