شەفەق نیوز/ خەڵک سێ گەڕەک لە قەزای خانەقین، ک لە سەردەم رژیم وەرین کەفتنە وەر بارکردن، داوای گلەوداین زەویلیان کردن، ک وەرجە بارکردنیان لەناوی بوینە، ئەوەیش دویای ١٨ ساڵ لە گلەوخواردنیان ئەرا ناوچەیلیان.
خەڵک گەڕەکەیل سیروان و بەختیاری و بان میل، ئەرا ئاژانس شەفەق نیوز داوایلیان رەسانن ک ئەو زەویەیلە ک دویای گلەوخواردنیان لە بارکردن رژیم وەرین وەناویان توومار بکریەن.
ئەندازیار سۆران عەلی وەڕێەوبەر شارەوانی خانەقین سەروە هەرێم کوردستان، ئەرا ئاژانس شەفەق نیوز وت: زیاتر لە ٦٠٠ خیزان لە گەڕەکەیل بەختیاری و سیروان و بان میل وەبان زیاتر لە ٢٠٠٠ ماڵ بەشەو بوینە، چەوەڕی تەواوکردن ریکارەیل توومارکردن ئەو زەویەیلە وەناویان کەن، ک دویای رمیان رژیم سەدام وەپیان بەشەو کریان.
وتیش: خیزانەیل ئەو سێ گەڕەکە نەتەوەیان هەمەڕەنگە و لەبارکردن ناچاری رژیم وەرین گلەو خواردنە، و لەوەر قەرەباڵغی دانیشتگی و قەیران نیشتەجیبوین، زەوی لەی سێ گەڕەگە ئەرایان بەشەو کریا، ئەوەیش وە بنەمای بەیاننامەیلیگ فەرمی لەلای ئیدارەی خانەقین.
لەوەر قەیران دیرکەفتن ریکارەیل ماڵداری، فرە لە خیزانەیل ماڵەیلیان فرووشتن، و بەشیگیش لە زەویەیل ئەرا چەن جاریگ فرووشیان.
وەڕیەوبەر شارەوانی خانەقین داوای زویکردن لە خاوەندارکردن زەویەیل ئەرا ئەوانەگ لە بارکردن گلەو خواردنە، جویر مسۆگەرکردنیگ تەواوی ئەرا مافەیلیان و سووکروکردن لاییگ لەو زیانە ک لەبارکردن ناچاری کەفتە وەریان.