شەفەق نیوز/ سەرچەوەیگ ئەمنی، ئمڕوو دووشەممە، خەوەردا لە دراوردن دوو تەرم لە ژیر پیەڵ جادریە و جمهوری، و قورتارکردن  سێیەم کەس لە خنکیان لە ژیر پیەڵ سنەک لە ناوڕاس بەغدای پایتەخت.

سەرچەوەگە وە ئاژانس شەفەق نیوز وت، " مەفرەزەیل فریاگوزاری دەریاوانی دوو تەرم دراوردنە لەناو چەم دیجلە لەژیر پیەڵ جادریە و جمهوری، هەمیش کەسیگ لە خنکیان قورتارکردنە هەنای لەناو چەمەگە لە ژیر پیەڵ سنک مەلە کەێد.

 و لە رویداویگ ئەمنی سەرچەوەگە دیاریکرد، " کەسەیل نەناسریاییگ  بومبیگ دەسی وشاننە و تەقە لە ماڵیگ لە ناوچەی عوبەێدی، لە خوەرهەڵات پایتەخت وەبی زەخمداری"، ئاشکەرایکرد،" خاوەن ماڵەگە سکاڵا دژ ئەو کەسەیل توومارکردیە".

 لە مژار ئەمنی، سەرچەوەگە وت، " ماشین وەجیمایگ پەیاکریاگە  لە شار سەدر خوەرهەڵات بەغدا، ک نارنجەک دەسی لەناوی بویە".

هەمیش لە بەغدا، تیم فریاگوزاری ناوچەی کویچەی کراکارەیل، چزدەر ئەلکترۆنیگ دەسگیرکردنە هەڕەشەی  هاوڵاتییگ دایە لە وەرانوەر بریگ پویل وینەل خیزانەگەی بڵاو نەکەێد لەبان تووڕ کۆمەڵایەتی لەناوچەی بەیاع.