شەفەق نیوز/ سەرچەوەیگ لە وەڕیەوبەرایەتی ریوبان و پیەڵەیل دیالە، ئمڕوو شەممە، خەوەردا لە دەسگیرکردن رانندەی بارهەڵگەریگ دویای ئەوە کە بویە هوکار رمیان پیەڵیگ لە قەزانیە.
سەرچەوەگە ئەرا ئاژانس شەفەق نیوز وت: ناوچەی دووڵ گوڵاڵە لە ناحیەی قەزانیە، ئمڕوو رویداویگ دڵتەزن وەخوەی دی، هەناێ پیەڵیگ رمیا لە ئەنجام رەدبوین بارهەڵکریگ کەرەستەی بیناکردن بار کردیە، کە بارەگەی لە ١٠٠ تەن زیاتر بویە، وە شکانن رینمایل ئەوە کە ئی پیەڵە ئەرا ئەو ماشینەیلە کریاس کە باریان لە ٣ تا ٥ تەنە.
سەرچەوەگە دیاری کرد کە پەیەڵەکە لە وەختەیل پڕبوین دووڵەگە تەرخان کریاس هەناێ لافاو لە ئیرانەو تیەێد، وتیش: رییگ ترەک نزیک پیەڵەگە هەی ئەرا بارهەڵگەرەیل کریاس، وەلێ رانندەی بارهەڵگەرەگە پاپەی ئەوە نەویە، و وەبان پیەڵەگەو رەد بویە تا رمیاس.
دیاری کرد کە دەسەڵاتەیل پەیوەندیدار رانندەگە دەسگیر کردن، لەبان شکانن رینمایەیل کە بویەسە هوکار ئی کارەساتە.