شەفەق نیوز/ کەرت چەودیریکردن تەندروسی لە خانەقین، ئمڕوو دووشەممە، ئاشکرای هووکار وسەرچەوەیل پەتای کولێرا لە قەزاگە کرد، هەمیش هەڵمەتەیل هوشیاری وروشنکردن و رەوانگەی مەیدانی ئەرا نواگردنی خەسەو کرد، ئەوەیش دویای توومارکردن چەن تویشهاتنیگ ک گومان لە بیماریەگە کریاگە.  

شوان شاکر دارا وەڕیەوبەر کەرت تەندروسی خانەقین ئەرا ئاژانس شەفەق نیوز وت: هووکارەیل تویشهاتن وە بیماری کولێرا لە پیسی ئاو نووشین تیەێد جویر هووکاریگ سەرەکی، لەوەر داڕزیان کۆمەڵەیل پاڵاوکردن ئاو، وهاتێ پاڵاوکردنەگە وتەمیسیەگە لەو پاڵاوەیلە لە هەفت گلە ئەرا سێ یا چوار گلە کوڵبڕەو کریەێد، ئەوەیش لەوەر قەرەباڵغی وەردەوام لە شمارەی دانیشتگەیل، وزیایبوین خوازین ئەرا ئاو لە سای رەوشەیل ئی تاوسانە، وکەم ئاوی لە ناوچەیل فرەیگ لە پارێزگای دیالە. 

ودیاری کرد ک هامشوو ناوبەین پارێزگایل وکەم هوشداری تەندروسی وپابەند نەوین وە مەرجەیل مقەیەتیکردن و تیکڵابوین، هووکاریگ ترو ئەرا تویشهاتن وە پەتای کولێرا، ک بایەتە هاووڵاتی بکەفێدە فتراق بەرزترین پلەی مقەیەتیکردن تەندروسی ئەرا ئەوە ک تویش ناێد.  

هەمیش باس دەسکردن وە هەڵمەت هوشیاریکردن وروشنکردن گشتگیر لەبان کولێرا لە گشت قەزای خانەقین کرد، ودووپاتکردن لەبان پابەندی وە مقەیەتیکردن و رینمایل پزشکی وەچەودیریکردن کار چیشتەخانە وقاوەخانەیل وچەسپیان مەڕجەیل ویاسایل مقەیەتیکردن و قەیەغەی بەشیگ لەو خوەراکەیلە ک پەتاگە تیارن. 

لەباوەت دەرکەفتن تویشهاتنەیل کولێرا لە خانەقین،  دارا دیاری کرد ک چەن تویشهاتنیگ لەلامان هەس گومان لە کولێرا دیرن، نموونەیلیان ئەرا تاقیگەی وەشکین بیماریەیل پەتایی لە بەعقوبە کلکریانە وئیجا ئەرا تاقیگەی بەغداد، وچەوەڕی ئەنجامەیل کەیمن تا یەکلاوە بوود.   

وەرجەیە، سەرچەوەیگ پزشکی ئەرا ئاژانس شەفەق نیوز باس دەرکەفتن دوو تویشهاتن وە کولێرا لە قەزای خانەقین کرد، وەگورەی ئەنجامەیل وەشکین لە بەعقوبە، باوجی لایەنەیل تەندروسی فەرمی ئەو تویشهاتنەیلە ئاشکرا نەکردن، تا ئەوەنە ئەنجام وەشکینیان لە تاقیگەیل بەغداد دووپات کریەێد.