شەفەق نیوز/ هاوپەیمان ''عراقیون'' وەسەرپەرشتی عەمار حەکیم، راگەیان پشتگیریی لە هەر رێککەفتنیگ حکومەت هەرێم کوردستان و حکومەت فیدڕاڵی بڕەسنە پی ئەرا چارەسەرکردن ناکۆکیەگان و باوەتە گیرهاتگەیل، بەڵکم وە مەرج چەودیەری لە بەرژەوەنی گشت پێکهاتەگان لە وڵاتەگە.
بەیاننامەی دەزگای سەرکردایەتی هاوپەیمان 'عراقیون' ئمڕوو دووشەممە، باس لە کۆبونەوەیگی کرد وە سەرپەرشتی عەمار حەکیم وەرپرس هاوپەیمانیەگە ، باس لە تەوەرەیل خشتەی کارەگان کرد جوور شایستەی هاتگ هەڵبژاردنی و سەردان موستەفا کازمی سەرۆک وەزیران ئەرا واشینتون، وهەمیش کفتوگۆ لە یەکێتی وتار راگەیانن لەناو هاوپەیمانەگە، وهەمیش باس پەیوەندیەگان لەناوبەین بەغداد و هەولێر، و نووەوبویەگان لە دۆخ سیاسی عراق و گەشەکردن باوەت نوواگردن پەتای کۆڕۆنا.
بەیاننامەگە وتیش؛ لەکۆبونەوەگە رێککەفتن لەبان گرنگی زەمینە ئامادەکردن ئەرا هەڵبژاردنەگان، ک رکابەری لەناوی وەشیوەیگ یەکسانی بوود لەناوبەین گشت لایەنەگان، دویر لە پویل سیاسی یا چەک یا رسواکردن سیاسی، وهەمیش تەواوکردن ریکارەگان ک پەیوەندی وە ئەنجومەن نوێنەران دیرێد جوور یاسای هەڵبژاردن و دادگای باڵای فیدڕاڵی، و ئەوەگ پەیوەندی وە حکومەت دیرێد، لە لایەن دابینکردن پێویستیەگان و پێکهاتە لۆجستیەگان ئەرا چارەسەرکردن بووشاییەگان ک کاریگەری لەیاساگە دیرن، وەگورەی ریکارە دەستوریەگان، وهانداین کۆمیسیۆن باڵای هەڵبژاردن ئەرا هاوکاری زیاتر وەگەرد شاندە نەتەوییەگە لەبنەمای سەرپەرشتییگ زیاتر لە چەودیریکردن لە دەسپاکی و توانای هەڵبژاردنەگە وریکارەیل کۆمسیۆنەگە، و هانداین ئەنجومەن نوێنەران ئەرا تەواوکردن خشتەی بازنە هەڵبژاردنەگان لە نزیکترین دەرفەت.
لەباوەت پەیوەندیەگان لە ناوبەین بەغداد و هەولێر، لەکۆبونەوەگە دووپاتکریا لە پشتگیرییان ئەرا هەر رێککەفتنیگ لەبەرژەوەنی عراق بوود وەشیوەی گشتی، وبەرژەوەنی گشت پێکهاتەگان لەناوی بوود، وهەمیش دەستور جوور مەرجیگ دانان ئەرا هەر گفتوگۆیگ لەناوبەین حکومەت فیدڕاڵی وحکومەت هەرێم.