شەفەق نیوز/ وەزارەت تەندروسی وژینگەی عراق، ئمڕوو یەکشەممە، دووپات کرد ک پابەندی وە ریکارە مقەیەتیەکان، وەتایبەت وەکارهاوردن دەمامەک لە واکسین زیاتر مقەیەتی لە کۆڕۆنا کەێد.

روبا فەلاح خانمە ئەندام تیم راگەیانن لە وەزارت تەندروسی ئەرا ئاژانس شەفەق نیوز وت: پابەندبوین وە ریکارە مقەیەتیەکان وەگەرد وەرگردن واکسینەگە خوەی تەنیا رییگە ئەرا قورتاربوین لەی پەتا، چوونکە چەسپیا ک وەکارهاوردن دەمامەک وەگورەی کاریگەری واکسینە، و شایەت فرەتریش بوود.

و دیاری کرد ک وەگەرد وەرگردن واکسینەگە لە فرەترین هەژمار لە هاووڵاتییەیل، رەسیمنە وەرگری کۆمەڵایەتی ک هالە رێژەی ٧٠ تا ٨٠ لەسەد، و دویای ئەوە قەیەغەگان سووکەو کریەن تا ئازادییگ فرەتر ئەرا هاووڵاتییەیل بوود، و ئیجا وەرگردن واکسینەگە وەگەرد پابەندی وە ریکارە مقەیەتیەکان فرە گرنگە ئەرا نواگردن لە ژمارەیل تووشهاتنەکان، و شکانن زنجیرەی بڵاوبوین پەتاگە.