شەفەق نیوز/ سەرچەوەیگ ئەمنی لە دیالە، ئمڕوو شەممە، خەوەردا لە کوشیان یەک مەدەنی وە رویداویگ دڵتەزن باشوور بەعقووبە، و نۆ کەسیش وە رویداویگ ترەک زەخمدار بوین.
سەرچەوەگە ئەرا ئاژانس شەفەق نیوز وت: کەسیگ مەدەنی گیانی لەدەسدا دویای سزیان ماشینەگەی مارکەی BMW لەبان ری بوهرز.
وتیش؛ تیمەیل تەندروسی و وەرگری شارستانی نەتوەنستن ناسنامەی قوربانیەگە بناسن، لەوەر ئەو کە تەرمەگەی بویەسە زوخاڵ، وتیش: تەرمەگە ئەرا پزشک دادوەری بریا و دەسەڵاتەیل هاتوچو لێکۆڵینەوە لە رویداوەگە واز کردن.
هەرلیوا، سەرچەوەگە وتیش؛ ٩ کەس زەخمدار بوین، سیێانیان زەخمییان سەختە، وە رویداویگ هاتوچو ناوەین ٥ ماشین لەبان ری حەمرین لەوەر تونی رانین و ناهوشیاری لە تاسەیل ریەگە.
وتیش؛ زەخمدارەیل ئەرا خەسەخانەیگ نزیک بریان، و دەسەڵاتەیل هاتوچو لێکۆڵینەوە لە رویداوەگە واز کردن.