شەفەق نیوز/ بینای دیوان پارێزگای دیوانیە، ئمڕوو سێشەممە، ژاوەژاو گەورەیگ و وەردەوەردە وە دەس لەناوبەین ئەندامەیل پاسەوانی وەرپرسەیلیگ لە پارێزگاگە وەخوەی دی، ک رەسیە زەخمداری چەن کەسیگ یەکیگیان جیگر پارێزگار بوی، ئەوەیش لەبان ناکۆکییگ سیاسی.
سەرچەوەیگ لەناو دیوان پارێزگاگە ئەرا ئاژانس شەفەق نیوز وت: مرافە و وەردەوەردە کەفتە ناوبەین پاسەوانەیل پەرلەمانتار نازم شبلی و پاسەوانەیل یەکەم جیگر پارێزگار دیوانیە فارس وەناس، ئەوەیش لەناو بینای دیوان پارێزگاگە.
سەرچەوەگە دیاری کرد ک ئەو ناوە بویە ژاوەژاو و پەنج کەس لە هەردوگ لایەنەگە زەخمدار بوین، یەکیگیان جیگر پارێزگار بوی، ک ئەرا خەسەخانەی دیوانیە بریا.
سەرچەوەگە وتیش: ئەوە لەبان ناکۆکییگ سیاسی لەبان وەڕیەوبەردن پارێزگاگە، و لەبان مرافەی کوینەیگ ناوبەینیان بویە، وتیش؛ هیزیگ ئەمنی رەسیە شوینەگە، و ریکارەیل سەختی لە دەورگرد خەسەخانەی دیوانیە و بینای دیوان پارێزگاگە جیوەجی کریا.