ئەو دویەت رفیایە لە تەمەن ١٣ ساڵان، لەی دویاییە وەگەرد باوانی ئەرا ناوچەی جبیرییەی سێ لە سامەرا بار کردنە، هەناێ وەرد دویەتە ئامووزاگەی، دویەکە جمعە، چینەس ئەرا پڕتاڵ سەنین لە ناوچە کویەنەگەی لە گەڕەک سکەک، خوەی وەتەنیا لە دوکانەگە چیەسە دەیشت، وەبی چەوەڕیکردن ئامەوزاگەی، ک وەگورەی قسەی ئەو سەرچەوە ک ئەرا ئاژانس شەفەق نیوز وت ک دویەتەگە تواستیە باێدەو ئەرا ماڵ، و دی دیاری نەمەنیە.

 وەلێ، دویای ئەو  ک لە دوکانەگە دەرچگە، نزیک یەکیگ لە جادەیل، دریاسە بان سەری و لە هووش خوەی چگە، تا دوینێد لە نزیک گەرکیگ نیشتەجیبوین لە ناوچەی گەڕەک شوهەدا کەفتیەسە بان ریەگە، و چیەسە ناو ماڵیگ، و باس کردیە چە وەسەری هاتیە، و موختار ناوچەگەیش ئاگادار دەزگایل ئەمنی و باوان دویەتەگە کردیە، و ئەرا بنکەیەگ ئەمنی بریایە تا ریکارەیل یاسایی و لێکۆڵینەوە جیوەجی بکریەێد.

وەگورەی قسەی سەرچەوەگە، دویەتەگە وەلایەن باندیگ نەناسیای کەفتیەسە وەر رفیان، و باوان دویەتەگە تەگبیر دیرن سکاڵای دادوەری توومار بکەن، تا بڕەسنە بندروس رفیانەگە، ک کامیرایل چەودیاری ئاشکرای هویردەکاریەیل رفیانەگە نەکردنە.

سەرچەوەگە دیاری کرد ک تەندروسی دویەتەگە خاسە، و ها ژیر لێکۆڵینەوە و چەودیاریکردن، و دەزگایل ئەمنی فەرمان وەشکین و مینەکردن باند رفاننەگە  ئەرا خاڵەیل وەشکین بڵاو کردنە.