شەفەق نیوز/ ئاژانس هەواڵی "تەسنیم" سەر وە سوپای پاسداران راگەیان،  ئەفسەریگ ئیرانی و شەش چەکدار لەکات رویوەروی بوین چەکدارەیلە  لە پارێزگای کرمان باشوور وڵاتەگە كوشیان. 

قسەکەر پۆلیس پارێزگای کرمان عەقید ئەمین غەفوری وە ئاژانسەگە راگەیان، " عەقید عەلی بەرزگەر ک یەکیگ بوی لە سەرکردەیل هیزەیل تایبەت سەر وە پۆلیس ئیران، لە مەوقەی رویوەروی بوین وەگەرد 6 چەکدار کوشیایە.  ‏

عەقید غەفوری وتیش، " هەمیش لە رویوەروی بوین چەکداری 6 تاوانبار چەکدار کوشیایە".

قسەکەر فەرمی سەرۆکایەتی پۆلیس کرمان دیاریکرد " لە ماوەی نزیکیگ هویردەکاری زیاتریگ لە ئۆپراسیۆنەگە راگەێنن "، بایەت هاوکاری هیزەیل پۆلیس بکریەێد وە ئامانج رویوەرویبوین ئەو کەسەیلە " ک ئاسایش و ژیان ئیرانیەیل خستنەسە وەر مەترسی".