نووترین مەزەنەیل تیم نەتەوە یەکگرتگەیل ئەرا مردن مناڵەیل وت: ٢.١ ملیۆن مناڵ و گەنج تەمەنیان لەناوبەین ٥ تا ٣٤ ساڵان لە خود ماوەگە مردنە، ک هەر ٤.٤ چرکە یەک مناڵ یا گەنجیگ مردیە.
راپۆرت نەتەوە یەکگرتگەیل ئمڕوو وتیش: ١.٩ ملیۆن مناڵ لە ساڵ ٢٠٢١ وەمردگی پەیا بوینە، وتیش: مردنەیل فرەیگ ئەگەر چەودیاریکردن تەندروسی خاستر بویاتاد وەنە زنی بوین.
فیدیا جانیش لە ریخریاگ یونیسێف وت: نەبایەت ئی نەهامەتیە ک توەنیمن خوەمان لەلی بەیمنە لا وە چشتیگ چەسپیاگ قەبوول بکریەێد، ئەگەر سیاسەت و بەرهەمهاوردن کونجیاگ ئەرا چەودیاریکردن تەندروسی ئەرا گشت ژن و مناڵیگ بوود.
نەتەوە یەکگرتگەیل لە بەیاننامەیگ وتیش لە ساڵ ٢٠٠٠ ریژەی مردن مناڵەیل خوار پەنج ساڵان لە جەهان وە ئاست ٥٠٪ داوەزیا، هەمیش ریژەی مردن مناڵەیل گەورەتر وە ئاست ٣٦٪ داوەزیا، و ریژەی پەیابوین مناڵ وەمردگی ئەرا ئاست ٣٥٪ داوەزیا.
تیم نەتەوە یەکگرتگەیل هوشداری کرد ک نزیکەی ٥٩ ملیۆن مناڵ و گەنج ئەوەسا وەرجە ٢٠٣٠ مرن، ئەگەر ریکارەیل تەندروسی وەزوی خاسەو نەکریەێد.
ئەنشو بانبرجی لە ریخریاگ تەندروسی جەهانی وت: شوین پەیابوین مناڵەگە ک کاریگەری لەبان دەرفەت مەنینی وەزنی لەبان زەوی دروس کەێد، کاریگ فرە نا دادپەروەرییە.