شەفەق نیوز/ ماڵپەڕ خەلیج نتودەوڵەتی، ئمڕوو سێشەممە، هووشدارییگ بڵاوکرد کە هاتێ کێبڵە ژیردەریاییە گرنگەیل بوونە ئامانج نوویگ ئەرا پەلامارەیل بانان حوسییەیل لە دەریای سوور، یەیش دەسنشانە ئەرا پەلاماریگ نوو کە توەنێد پەیوەندییە جیهانییەیل و ئابووری وە شیویگ جددی.
ڕاپۆرتەگە وتیش: "تووڕیگ لە کێبڵ پەیوەندییە گرنگەیل ژیرئاو توەنێد بوودە ئامانجیگ نەرمی ئایدیاڵ ئەرا پەلامارەیل بانان حوسییەیل و ئی ئەگەرە بایەسە گست ئەو وڵاتەیلە بگرێدەو کە پشت وەی ژیرخانە گرنگە بەسن، چ لە نزیک و چ دویر."
پەلامار حوسییەیل کە کەشتییە بازرگانییەیل دەریای سوور کردنەسە ئامانج، مەترسییگ گەورە لەبان کەشتیوانی دەریایی دروسکردیە، بەڵام وەگورەی راپۆرتەگە هاتێ باوەتەگە لە پەلامارەیل روی دەریا بڕەسێدە لەوە قویلتر کە کێبڵ دەریایی بوودە ئامانج نوو حوسییەیل لەی جەنگە.
وەرجەیە، کەناڵیگ تەلەگرام کە پەیوەندی وە حوسییەیل دیرێد، ڕاپۆرتیگ بڵاوکرد و وینەیگ وەگەردی بوی، کە نەخشەی تووڕەیل کێبڵ پەیوەندی ژیردەریایی لە دەریای ناوەڕاس و دەریای سوور و دەریای عەرەبی و کەنداو عەرەبی نیشان دا.