ئی زریانە بویە مدوو گیانلەدەسدان پەنج کەس لە دوورگەی تایوان هاوسا.
گامی تونوتیژترین زریانە کە لە ماوەی هەشت ساڵ روی لە دوورگەگە کردگە و تونی وای رەسێ٦ ١٩٠ کیلۆمەتر لە ساعەتیگ.
رووژ پەنجشەممە، زریانەگە ریڕەو ئاو شار کاوسیونگ کە دویەم گەورەترین شار تایوانە لە دویای تایپە، کردە چەمیگ.
زریان گایمی واران وەرزی لە فلیپین خراوتر کرد و بویە هوکار دروسبوین لافاو و خورمیان زەوی کە بویە مدوو کوشیان ٢٠ کەس.
ئیوارەی پەنجشەممە زریانەگە رەسیە هشکایی لە چین و خەسیەگەی کەمکرد، بەڵام هیمان واران رفتیگ لەبان بەش فرەیگ باشوور و خوەرهەڵاتی وڵاتەگە وارێد.
لە پارێزگای فوجیان (خوەرهەڵات) کە کەفتیەسە وەردەم تایوان، زیاتر لە ٢٩٠ هەزار کەس لە رخ لافاو لەماڵ دراتن، وەگورەی ئاژانس خەوەری چین نوو.
هەمیش لە بەشیگ ناوچەیل پارێزگاگە هامشوو و مەکتەو و بازاڕ و خزمەتگوزارییە گشتیەیل وسیا.
وەگورەی ئەو وینەیلە کە لەلایەن تەلەفزیۆن وڵات چین کەناڵ سی سی تی ڤی پەخشکریانە، لە پارێزگای شیجیانگی، لە نزیک شەنگەهای، مەردم تا زرانی لەناو ئاو پاسکیلەیل لاوردیان و ئەو دارەیلە کە لە جادە لافاواوییەیل شکیانە.
شارەوانی وێنژۆ، شاریگ گەورەی پارێزگاگە و نۆ ملیۆن کەس هاناوی، هووشداریی زریان سوور بڵاو کرد کە بەرزترین ئاستە و زیاتر لە هەفت هەزار کەسی دەرکرد، وەگورەی ڕاپۆرتەیل تەلەفزیۆنی.
میدیایل دەوڵەتی وتنە کە نەمەنە کریا ئەو زریانە وارانیگ رفت ئەرا پارێزگایل جیانگشی و هێنانی ناوڕاس بوەێد، تا ئیسە هیچ زەخمدارییگ توومار نەکریاس.
لە پارێزگای گوانگدۆنگ (باشوور) کە ناوەند پیشەسازی چینە و شمارەی مەردمی نزیکەی ١٢٧ ملیۆن کەسە، بەشیگ کڕ ئاسن پەکیان کەفت.