محەمەد شەوکەت عۆدە وەڕێەوەبەر ناوەند ناودەوڵەتی گەردونناسی سعودیە بەیاننامەیگ راگەیانیە، ئەو وڵاتەیلە لە رووژ سێشەممە ٢١ی ٣ی ٢٠٢٣ وەدویاچگن ئەرا دوینین مانگ کەن، لەو رووژە مەحاڵە چوینکە زویتر ئاوا بوود.
وتیش، ئەو وڵاتەیلە لە رووژ چوارشەممە ٢٢ی ٣ مینەی مانگ کەن خوەرهەڵات جەهان، هاتی لەو رووژە مانگ بدوینن ئەویش وەڕی وەکارهاوردن تیلیسکۆب، لەهەمان وەخت لە ناوڕاس ئاسیا و خوەرهەڵات ئەوروپا و باشور ئەفریقا توەنن مانگ بوینن، باوجی تەقەلای فرەیگ خوازێد، هەمیش لە خوەرئاوای ئاسیا، فرەیگ لە ئەفریقا، خوەرئاوای ئەوروپا و ئەمریکا تاڕادەیگ وە چەو ئاسایی دوینریەێد.
پەیمانگای میسری ئەرا توێژینەوەی گەردونناسی لە دویا راپۆرت خوەی باس لەوە کردیە، مەزەنەکریەێد رووژ ٢٢ی ٣ی ٢٠٢٣ کۆتا رووژ مانگ شەعبان بوود و یەکەم رووژ مانگ رەمەزانی ساڵ ١٤٤٤ی کۆچی کەفێدە رووژ پەنجشەممە بڕوار ٢٣ی ٣ی ٢٠٢٣.