شەفەق نیوز/ 16 دەریاوان قورتاریان بوی ویەکیگیش نوقومبوی لە نوقومبوین تانکیگ کە پەرچەم فلیپین هەڵگردوی وەگەرد 1.4 ملیۆن لیتر سزەمەنی پیشەسازی لە کناراو مانیلای پایتەخت، ئیرنگە دەسکریاس وە ئۆپراسیۆنیگ ئەرا بەرەنگاربوین دزەکردن سزەمەنی وەناو ئاوەگە.
وەزیر گواستنەوەی فلیپینی خایمی باوتیستا لە گۆنگرەیگ رووژنامەوانی وت: توەنستینە 16 لە بنەرەت 17 کەس لە تیمەگە قورتاربکەین و کەسیگیش گیان لەدەسداس".
دیاریکرد " وای تونیگ و شەپۆلەیل بەرز گیچەڵ ئەرا تەقەلای فریاکەفتن دروسکەێد".
رویداوەگە لە کەنداو خەلیج مانیلا رویدایە، لەدویری نزیکەی 7 کیلومەتر (4.3 ميل) نزیک شارەوانی لیمای لە ناوچەی باتان، نزیک پایتەخت، لە ساعەتەیل سەرەتای ئمڕوو پەنجشەممە.
پاسەوان کناراوەیل فلیپین لە راپۆرتیگ راگەیان کەشتی The MT Terra Nova "پلیایە و لەکۆتایی نوقومبویە".