وەزارەتەگە لە بەیاننامەیگ وت: تا نزیک ساعەت هەفت شەوەکی وەوەخت ناوخوەیی، ٦٣٢ مردن و ٣٢٩ زەخمدار توومار کریا، لەناویان ٥١ کەس زەخمییان سەختە، وەگورەی ئاژانس فرانس پرێس.
وەزارەتەگە وتیش؛ دەسەڵاتەیل گشت توانایان خستنەسە کار ئەرا پیشکەشکردن دەسمیەتی و هەڵسەنگاندن زەرەدەیل.
سەنتەر زەویلەرزەگە لە هەرێم حوز باشوور خوەرئاوای شار مەراکش دیاری کریا، لە وەختیگ پەیمانگای نیشتمانی جیوفیزیا وت؛ زەویلەرزەگە لە ناوچەی ئیگیل لە کویەیل ئەتڵەس گەورە بویە و تونیەگەی رەسیە ٧.٢ پلە لەبان پەیمانەی ریختەر.
ناوچەی ئیگیل گویەیی کە چەن ئاواییگ بویچگ هاناوی، کەفێدە نزیکەی ٧٠ کێلومەتر وەرەو باشوور خوەرئاوای مەراکش.
زەویلەرزەگە دویای ساعەت ١١ی شەو جمعە وەوەخت ناوخوەیی بوی.
دانیشتگەیلیگ لە مەراکش وتن: بەشیگ لە بینایل لە شار کوینە کە لەبان یونیسکۆ توومار کریایە رمیان، و تەلەفزیۆن مەغریب وینەی کەفتن مەنارەی مزگەفتیگ و چویچیان پارچەیلیگ لەبان ماشینەیلیگ شکیای نشان دا.
مونتەسەر ئیتری یەکیگ لە خەڵک ئاوای ئەیسا نزیک زەویلەرزەگە وت: ماڵەیل فرەیگ زەرد وەپییان رەسێد، وتیش: هاوسامان هانە ژیر رمیاگەیل، و خەڵکەگە وەوەگ وەدەسیان تیەێد تەقەلای رزگارکردنیان دەن.
وەرەو خوەرئاوا نزیک شار نارودانت، مامووستا حەمید ئەفکار وت؛ لە ماڵەگەی وایە و لەرزەیلیگ لە شوین زەویلەرزەگە تەکان دان.
لە قسەیلی ئەرا ئاژانس فرانس پرێس وتیش: زەویەگە تا نزیکەی ٢٠ چرکە لەرزیاد، و دەرەیل لەخوەیانەو واز بوین و بەسیان، هەنای لە قات دویەم هاتمە خوار.
ئی زەویلەرزە بەرزترین شمارەی قوربانیەیل توومار کردر دویای زەویلەرزەیگ نزیک حسیمە لە ساڵ ٢٠٠٤، کە بویە هوکار کوشیان زیاتر لە ٦٠٠ کەس.