شەفەق نیوز/ دادگایگ ئەمریکی، ئمڕوو چوارشەممە، سزای کابرایگ میسری دا ک لە ساڵ ٢٠٠٨ دوو دویەت خوەی کوشتیە، و ١٢ ساڵ وایە، تا لە ساڵ ٢٠٢٠ دەسگیر کریا.   

ئاژانس ئەسۆشیتد پڕس وت: دادگای ویلایەت تەکساس، سزای یاسر عەبدولفەتاح سەعید دایە ک میسریە، وە تاوان کوشتن دوو دویەتی لە ساڵ ٢٠٠٨ ، و فەرمان زیندان هەتاهەتایی دا. 

ئاژانسەگە وتیش: ئەو باوگە دوو دویەت ناخاڵەی خوەی کوشتیە، ئەمینە ١٨ ساڵان، وسارە ١٧ ساڵان، وە تاوان شەرەف، ئیجا وایە، تا لە ساڵ ٢٠٢٠ دەسگیر کریا.  

ئاژانسەگە دیاری کرد ک دوو دویەتەگە لەناو ماشینیگ تەکسی پەیا کریان باوگیان رانیادەی، لە نزیک هوتێلیگ لە داڵاس لە رووژ سەرساڵ نوو لە ساڵ ٢٠٠٨، و هەردوگیان گولە لەلیان دریاگە، باوجی سارە وەگیان بویە، و تەلفۆن فریاکەفتن کردیە تا ئاگادار دەسەڵاتەیل بکەێد ک باوگیان گولە لەلیان وەشانیە، ئیمجا هەردوگیان گیانیان لەدەسدان.  

ئاژانسەگە وتیش: وەرجە یەک هەفتە لە کوشتن ئەو دوو دویەتە، هەردوگیان وەرد داڵگیان و کوڕیگ یاریان لە ماڵ خیزانەگە لە ناوچەی لویڤیل لە داڵاس لەدەس باوگە دەرچینە.  

خانمە بانگەوازکار گشتی لۆتین بلاک وت: دوو خوەشکەگە رخیان چییە، و بڕیار دانە لەماڵ دەرچن، دویای ئەوە ک باوگەگە دەوانچە ناسە قەی سەر ئەمینە و هەڕەشەی کوشتی دایە.  

لە پەیامیگ ئەرا دادوەر وەرجە دادسازین، سەعید نویسان: ک خوەی رازی نییە دوو دویەتەگەی وەرد دوو پیاو بگونجیەن، ولێ وت من نەکوشتمەسەیان.