کارین جان پیێر، قسەکەر کۆشک چەرمگ لە بەیاننامەیگ کە (شەو چوارشەممە) بڵاویکرد، ڕاگەیان، وەشکین سەرۆک ئەمریکا پۆزەتیڤ بویە و تویش ڤایرۆس کۆرۆنا بویە، و زیان لە  نیشانە سووکەیلی دیرێد. 

 وتیش: بایدن خوەی کەرەنتین کەێد و لەو ماوە وەردەوام بوود لە جیوەجیکردن تەواو ئەرکەیلی.

 دیاری کرد کە کۆشک چەرمگ وەردەوام زانیاری نوو لە تەندروسی سەرۆک ئەمریکا دەێد لە وەختیگ وەردەوامە لە ئەنجامدان ئەرکەیلی لە کەرەنتین.

  لە زوان کیڤن ئۆکۆنۆر، پزیشک سەرۆک ئەمریکا هاتگە، بایدن نیشانەیلی جویر ئاو لویت و قوتە وەرد هەسکردن وە ناڕەحەتی دیرێد، لەبان ئەوە وەشکین ئەرای کریاس، و ئەنجامەگانیش پۆزەتیڤ بوین، و هەر لەوەر ئی مدووە بایدن خەەی کەرەنتین کەێد.

 لە یەکەم دەرکەفتنی دویای ئەوەگ کۆشک چەرمگ ڕایگەیان کە تویش بیماری Covid-19 بویە، جۆ بایدن سەرۆک ئەمریکا ڕایگەیان کە "رەوشی خاسە"، دویای ئەوەگ لە گەشتیگ هەڵوژاردن ئەرا لاس ڤێگاس تویشهاتنی وە ڤایرۆس کۆرۆنای چەسپیا.

 وەگورەی ئاژانس فرانس پرێس، بایدن مەوقەی سواری فڕۆکەی وەرجە ئەوەگ وەرەو ماڵەگەی خوەی لە ویلایەت دێلاوێر بچوود، وڵ رووژنامەنویسەیل وتگە "هەس وە خاسی کەم".