دەسەڵاتدارەیل تایوان و ژاپۆن و فلیپین هووشداریی تسونامی بڵاوکردەنە وەرجە ئەوەگ دویاتر لایبوەن.

وەرجەیە وەڕێوەبەرایەتی ئاگرکپەوکردن تایوان راگەیان؛ گومان هەس کەسیگ لە پارێزگای هوالیێن کە کەم دانیشتگەیلە تلیاس لە ئەنجام کەفتن سەنگ لەبان کویە لە خوەرهەڵات ئەو وڵاتە کە ناوەند زەویلەرزەگە هاناوی، و مردگە، و زیاتر لە 50 کەسیش زەخمدار بوین.

وەگورەی ئاژانس ڕۆیتەرز،  لەلای کەمەو 26 باڵەخانە رمیاگە کە زیاتر لە نیمەیان لە شار هوالین بوین و نزیکەی 20 کەس گیر هاتنە لە وەختیک هیمان کارەیل ڕزگارکردن وەردەوامە.

کەناڵە تەلەفزیۆنییەیل تایوان گرتە ڤیدیۆی بینایل نشان دا کە وە شیوەی فرەیگ لارەو بوینە، کە زەویلەرزەگە لە کەناراوەیل بویە نزیکەی ساعەت 8 شەوەکی وە وەخت  وڵاتەگە، واتە لە ساعەت 12:00ی نیمەشەو وە وەخت ناوەند ئەمریکا، لە و خەڵک لەناو ری بوین وەرەو شوینەیل کار و مەکتەو.

 ئیدارەی ناوەندی کەشناسی لە تایوان راگەیان؛ زەویلەرزەگە لە قویلایی 15.5 کیلۆمەتر لە کەنارەیل خوەرهەڵات دوورگەگە ڕویداس.

ئاژانس هەواڵی ناوەندیی فەرمی تایوان راگەیان؛ یە قایمترین زەویلەرزەس لە دویای ساڵ 1999ەو لەو دوورگە بەێد، کە دویاترین زەویلەرزە وە تونی 7.6 پلە نزیکەی 2400 کەس گیانیان لەدەسدان و 50 هەزار باڵەخانە وە تەواوی یا بیشیگیان کاول کرد لە یەکیگ لە خراوترین زەویلەرزەیل کە لە تایوان توومار کریاس.

 لە تۆکیۆ، دەزگای کەشناسی ژاپۆن راگەیان؛ شەپۆل بویچگ "تسۆنامی" رەسیەسە بەشیگ لە باشوور پارێزگای ئۆکیناوا، ئیجا هووشدارییەگەی تسۆنامی کەمەو کرد،  وتيش: توني زەویلەرزەگە رەسیە 7.7 پلە.

سەرچەوەیل ئاژانس ڕۆیتەرز وت: هیمان هەس وە جیماگەی تەکان لەرزەگە لە تایپە کریەێد، کە ئیدارەی ناوەندی کەشناسی تا ئیسە لەلای 25 زەویلەرزە توومار کردگە.

ژاپۆن فەرمان چووڵکردن ناوچە کەنارییەیل نزیک پارێزگای ئۆکیناوای باشووری دەرکرد دویای ئەوەگ زەویلەرزەگە، ئمڕوو چوارشەممە، بویە مدوو ئەوەگ هووشداریی تسۆنامی دەربکەن.

ئاژانسەگە وت: شەپۆلەیل وە بەرزی 30 سانتیمەتر لە ساعەت 9:18 شەوەکی وە وەخت وڵاتەگە رەسیە دوورگەی یۆناگونی.

 دەزگای زەویلەرزەزانی فلیپین هووشدارییگ ئەرا دانیشتگەیل ناوچە کەنارییەیل چەن پارێزگایگ بڵاو کرد و داوا کرد بچنە شوینە بەرزەیل.