شەفەق نیوز/ یەکێتی ئەوروپا، ئمڕوو دووشەممە، واژوو لەبان بڕیار چەسپیان سزایلیگ لەبان وەرپرسەیلیگ ئیرانی کرد، لەناویان فەرماندەیلیگ لە پۆلیس ئەخلاق، لەوەر ئەو کوشتن و بڕین خوینینە لەبان ناڕەزاییەیل ک یە زیاتر لە یەک مانگە دەسوەپی کردیە.
ئاژانس فرانس پڕس وت: وەزیرەیل دەروونی یەکێتی ئەوروپا واژوو لەبان ئەو کیست سزایلە کردن ک لە رووژنامەی فەرمی یەکێتی ئەوروپا بڵاو کریا، و ١١ وەرپرس ئیرانی بوین، ک عیسا زارپور وەزیر راگەیانن، و چوار پیکاتە لەناویان بوی، و ئەوەسا کەفنە قەیەغەی ڤیزای یەکێتی ئەوروپا و هشکەوکردن سەرمایە.
وەرجەیە، ئەنالینا بیربوک خانمە وەزیر دەرەوەی ئەڵمانیا ئەرا رووژنامەنویسەیل وت: ئەوەسا بڕیگ سزا لەبان ئەو وەرپرسەیلە چەسپنیمن ک وەرپرسن لەبان تاوانەیل وەحشیانە دژوە ژن و گەنج و پیاوەیل.
وتیش: ئەوەگ وەپیان ئویشن "پۆلیس ئەخلاق" هانە ناو ئەوانە، و پۆلیس ئەخلاق لەڕاسی ناویگە لەشوین خوەی نییە، ئەگەر بنووڕینە ئەو تاوانەیلە ک لەورا جیوەجی کریەن.
جان ئەسیلبۆرن وەزیر دەرەوەی لوکسەمبورگ وت: سزایل یەکێتی ئەوروپا لەبان ئیران تەنیا لەوە نییە ک چەن کەسیگ لەناو لیست سیا توومار بکریەن، ک ئەوە چەسپیا ک تەهران دەسی هاناو جەنگ رووسیا لەبان ئۆکرانیا.
و هەنای رەسیە گردەوبوینەگە، ئەرا رووژنامەنویسەیل وت: ئەگەر وەیجویرەس ، سزادان چەن کەسیگ بەش نیەکەێد.