شه‌فه‌ق نيوز/ عه‌باس عراقچى ده‌سميه‌تده‌ر وه‌زيرى خارجيه‌ى ئيرانى ئه‌را كاروبار سياسى، وت: ئه‌گه‌ر له حاڵه‌تيگ فرووش نه‌فتى ئيرانى وه بوونه‌ى سزايه‌يل ئه‌مريكييه‌و هاته‌و ئه‌را سفر، ئه‌وه ته‌هران داوا له هاووڵاتيه‌يل ئه‌فغانى ناو خاكه‌يلێ ئه‌كا وڵاته‌گه بيلنه‌جێ.
عراقچى له باسيگ ته‌له‌فزيۆنى وت: حاڵ حازر نزيكه‌ى 3 مليۆن په‌نابه‌ر ئه‌فغانى له ئيران ژيه‌ن، ك ئه‌گه‌ر سزايه‌يل ئه‌مريكى كاريگه‌رى خراوتر كرده بان وڵاته‌گه‌و داهات دارايى ئيرانى دياريكرياگه‌و بوێ و فرووش نه‌فت ره‌سيه سفر، ئه‌وه له‌ى حاڵه‌ته كۆمار ئسلامى داوا له خوه‌يشك و برايه‌يل ئه‌فغانى ئه‌كا ئيران بيلنه‌جێ.
جى باسه، ده‌سميه‌تده‌ر وه‌زيرى خارجيه‌ى ئيرانى ئه‌را كاروبار سياسى هه‌ميش وت: له‌ى حاڵه‌تيشه بژاردن ئه‌كه‌فێده ئه‌و په‌نابه‌ره‌يله ئه‌گه‌ر بخوازن بچنه‌و ئه‌را وڵات خوه‌يان يا بچن وه‌ره‌و وڵاته‌يل تر.