شەفەق نیوز/ لە ئه‌نجام وه‌رده‌وام بۊین لە كاره‌ێل وەشکین له ناوچه‌ی حه‌ڕان له پارێزگای ئورفا كه یه‌كیگە له ناوچه هه‌ره کۊنەێل نیشتەجیبۊین له جەهان و ناوی له لیست كاتی میرات جەهانی یونیسكۆیە، مەکتەو ئایینیگ پەیاکریا ك مێژووگەی ئەرا سه‌ده‌ی ١٢ زایینی چوود.
مه‌همه‌ت ئۆناڵ سه‌رۆك به‌ش شۊنەوارناسی لە زانكۆ حه‌ڕان و سه‌رۆك ناوچه‌ی مینەکردن و وشکنین حه‌ڕان راگەیان، ماوه‌ی هه‌شت ساڵه وه هاوكاری دامه‌زراگە په‌یوه‌نیداره‌ێل به‌رده‌وامن له كاره‌ێل مینە و وەشکین و باس لەوەکرد، "مەکتەو ئایینیی پەیاکردنە كه مێژووه‌گەی ئەرا سه‌ده‌ی ١٢ و سه‌رده‌م دەوڵەمەنێل چوود، وەرجە یە زانستنە كه پەنج مەکتەو ئایینی له حه‌ڕان بۊیە. باوجی یه‌كه‌مجاره له حه‌ڕان ئه‌و مەکتەو ئایینییه پەیا بوود".
وتیش، "لەبان خوەڵ ٢٤ ژوور ده‌سنیشان کردنە، پەنج ژوور و دەر گەپ مەکتەوەگە و بەشێگیش له هه‌یوانه‌گەی وە تەواوی دەراوردنە، له تەک ئه‌و ژوورەێلە ئاشپەزخانە هەسن كه قوڵكه‌ئاور و ته‌نۊیر لەناوی دەرکەفتگە، له‌وه‌وه ده‌رده‌كه‌فێد ئه‌و ئاشپەزخانە خوەراک ئەرا فرەکەس لەناوی ئامادە کریاگە له نزیک ئاشپەزخانەگە سووقان ئاژه‌ڵ بۊیچگیگ دۊینریەد".
لەو بارە جیهاد کۆچ قائیمقایم حه‌ڕان راگەیان، "یه‌كه‌م زانكۆی جەهان له حه‌ڕان بۊیە. تەقەلایەێلمان خەسەو کردیمنە ئەرا دەرخسن بەشەێل ئەو زانکۆیە وە تەواوی".