نۊن بردمە ڕێ مەنزڵد
گیان لاونێ باخِ دڵد
مەس بوومە بوو،سروەێ گوڵد
شان داگرێ پرزەێ گوڵاو
ئەێ زاڵِ زڕ کووەِ پەراو
وەێ پرچِ چەرمێ ئاودە
وەێ چینِ رۊ پاتاودە
هەمسانِ سەر‌کەش ناودە
ڕێ خەێدەوەر، ترنگەێ شەواو
ئەێ زاڵ زڕ کووەِ پەراو
میواندم ئالی نەسەو
لەێ سینە بشکن شاخِ شەو
تا بەێدە چەو تاسەیلِ کەو
عەدلد بکە ڵەێنو وە باو
ئەێ زاڵِ زڕ ،کووەِ پەراو
مِن بانِ مەکتەو دامە خەت
گِردەنشینی کەێ شەکەت
ڕێژەێ چەوان بوودن وە شەت
تێ فیسنێ کوومەێ کتاو
ئەێ زاڵِ زڕ، کووە پەراو
پرشەیلِ چەشمە ها دەرد
بوودە نگینِ شەۊ وەرد
ئەوریشمە وەفرِ سەرد
تاسەێ منە نەرمە خوەناو
ئەێ زاڵ زڕ، کووەِ پەراو
شەودێزِ خەسرەو هاتە لاد
ورشەێ شرین رشیادە پاد
عەسکێ بۊە جامەک ئڕاد
شکیا وە‌پێ نەێزەێ هەتاو
ئەێ زاڵ زڕ کووە پەراو
ڕشیا هناێ شوورِ شرین
فەرهادِ خەم ، هاتە کەمین
بۊدە تە مەنگاێ مە جەبین
پاتووقەگەی ساکی سراو
ئەێ زاڵِ زڕ، کووە پەراو
گەپ بەێ لە قەوومِ مادِ نۊر
تاڕانن یوونانِ دۊر
حڤزِ مەدائن بارە هۊر
لەێ شارە هەم قەلعەێ بناو
ئەێ زاڵ زڕ کووە پەراو
ئێکەش لە ئێڵِ زەنگنە
سنجاوی و جافِ سنە
قە‌ڵخانی و لەک یەێ دەنە
وریا کەرەیلِ خاک و ئاو
ئەێ زاڵ زڕ کووە پەراو
چۊ کەڵهڕ گەورا تەوار ؟
گووران و کەر گاێ سەر سوار
لەو هاجیانە دان لە تار
کەفتن لە عوسمانی وە تاو
ئەێ زاڵ زڕ کووە پە راو
زانی وە خۊن ،تشنەۊ سەدام
جامِ شەفەق، پێ دا سەقام
داێەێ شەهیدِ ، نەو نمام
پەشتانە دەس ، زڵفانِ خاو
ئەێ زاڵ زڕ کووە پەراو
ئێران عە‌لی‌کە‌رەمی