هەم وەهارام نەمەن هەم بەرگ و بارم ئەی هەوار

باخ و بووسانم وە تاڵان چی هەوارم ئەی هەوار

یە چە بۊ چۊ بۊ نیەزانم، ئێ ڕێیە کەفتە وەرم

چۊ بمیم چۊ بچم چۊ خوەم بشارم ئەی هەوار

کووس کەفتێ ڕەنج بێوەر، لەی سەرانەی پیرییە

هەم ئەسیر ناکەسم هەم دەردەجارم ئەی هەوار

یە گەڵاڕێژان عومرە، هەێڕوو هەێڕوو ڕوو وە خوەم

پۊچ و بێبەر سینە سزیا جۊ چنارم ئەی هەوار

چار ناچارم یەسە هەر خوەم کوتەڵکوو خوەم بکەم

خوەم وە خوەم کردم وە کردەی خوەم دوچارم ئەی هەوار

هەر چمانێ کوتەڵەی دووزەخ هەناسەم دۊکەڵە

تا وە کەی لە تاو دڵ ئاگر بوارم ئەی هەوار

باخەوانی کردنم جۊ ئاویاری دڕگە

زۊخ و زۊخاوە نەسیبم هەرچێ کارم ئەی هەوار

شوون و نۊنم لەی بەرەهووتە ئەجەڵ گوم کردێیە

خوەم وە دەس خوەم مەگەر ڕیشەم درارم ئەی هەوار

لەی دیارە تاگە "پەرتەو" هەرکە ساز خوەێ ژەنێد

م چە زانم م چە بۊشم م چە بارم ئەی هەوار

شێعر  : په‌رته‌و کرماشانی