هێلم هه‌ناسد بكه ناو باخه‌گان

داره و په‌ل و په‌لوه‌چ و ريشێگ بنور

هووز روونج و دەم تيشگ بنور

هيوچ وه ئه‌و جه‌نگه‌ل داره نه‌مه‌ن

بيجگه خه‌ويگ وه ئه‌و وه‌هاره نه‌مه‌ن

هه‌ر له‌ش داره‌يله كه فيده‌و زه‌مين

داوڵ وشكی وه‌ليان ها له قين

گيان خوه‌د و گيان په‌ل و په‌لوه‌چه‌يل

گيان خوه‌د و گيان ده‌ر و ده‌روه‌چه‌يل

هيورد وه چيوزه‌يل يه‌تيم هه‌ل نه‌گر

وه خاتر ئه‌زره‌ت داره‌يل نه‌مر

ئه‌زره‌ت داره‌يل وه‌هاره هیمان

سه‌وزي بي تيشگ و ژاره هیمان

هاي هه‌نوز ها له خيال زه‌مين

وشكه په‌له‌يل،ئه‌راي چه چيوزه نيه‌ين؟

كەی دڵ ئێ ئاو چه‌مه شاد كه‌ي؟

هه‌ر چي كه‌لاوه‌يله‌سه ئاباد كه‌ي؟

---

هه‌ناسه‌گه‌ی گه‌رم زه‌يو و ئاسمان

ماچ بكه زه‌خم په‌ل داره‌گان

پيوش وه پيوش مال مه‌ليوچگ بساز

به‌و ديوه‌ته‌گه‌ی هووز وه‌هاران بخوواز

تك‌تك واران وه جيازی بكه

چادر نيووريگ وه ئه‌نازی بكه

ئه‌سر چه‌ود پيشكه‌ش ريشگ بكه

نوور بكه،ناله‌ت تيشگ بكه

ئی زه‌يوه بايه‌س جی داره‌يل بوو

بان سه‌ری مانگ و هه‌ساره‌يل بوو

دان وه دان جيقه بيه‌ن بانه بان

هه‌ر جی وشكی بكه‌نه سه‌وزه‌لان

زار و زه‌يو و ده‌يشت و كيوه سه‌وز بوو

جار و گه‌نم،ماش و جيوه سه‌وز بوو

هه‌ناسه‌گه‌ی گه‌رم زه‌يو و ئاسمان

ده‌سيگ بكيشه‌و سه‌ر نوماله‌گان

يه‌ی په‌ر په‌رچينی ئه‌رايان بكه

سه‌ر نمازيش دوئايان بكه

 رضا جمشیدی