هەر لە روژاوا تاگەر روژهڵات
دەنگ پاێ نەوروز تێەێدن لە وڵات
نەوروزمانگ پا نا، لە ماڵ وەهار
شەوبو وریاێ کەێ، دوکوت شەوار
کۊەیل بەێداخ زمسان هەڵکەنن
گەل گەل گوڵان ، گەڕێان هەڵپەڕن
سروە سەماکەێ سێرە ساز ژەنێ
چیمەنِ سەوزپوش، وەنازەو خەنێ
چنار سەرچوپی لە ناو داران
دەنگ دڵداران، نم نم واران
تازە دەزۊران لە سۊک باخەو
چ تامێ دێرێ ماچ وە قاچاخەو
دنیا چۊ وەهار سێ چوار روژێگە
کینە هەڵکەنن هەرچەن توژێگە
وەهار هەم هات و کەس نەمەن ناڵان
خودا خەم دۊر کە، لە کوردە ماڵان
ئومێد کەلهڕ