سەرۆک هەرێم کوردستان لە بەیاننامەیگ رەسیە ئاژانس شەفەق نیوز وت: "پرسە و سەرەخوەشی لە بنەماڵەی رەحمەتی شاعیر کورد جەمال شاربەژێڕی و گشت رووشنهویرەیل کوردستان کەم، داوایش لە خودای گەورە کەم  بخەێدەی وەر ڕەحمەت خوەی و سەبووری و دڵنەوای گشتی بەێد". 

 بارزانی وتیش: رەحمەتی وە بەرهەمەیلی خزمەت لە بوار ئەدەبی و رووشنهویری لە کوردستان کرد و کۆمەڵە شیعریگ دەوڵەمەن و دەق رەنگینی پێشکەش وە خوەنەر کرد.

شاعیر ناسریاگ مۆدێرنیست کورد و یەکیگ لە واژووکارەیل بەیاننامەی ئەدەبی روانگە بوی لە سەرەتای هەفتایل سەدەی گوزەشتە، جەمال شارباژێڕی رووژ دووشەممە لە تەمەن هەشتا و دوو ساڵی لە لەندەن پایتەخت بەریتانیا کووچ دوایی کرد.

شارباژێڕی لە 1 تشرین یەکەم ساڵ 1941 لە ئاوای واژە سەر وە قەزای چوارتا لە پارێزگای سلێمانی، لە هەرێم کوردستان لەداڵگبوی.

شارباژێڕی یەکیگە لەو پەنج شاعیر و رووشنهویرە کە لە سەرەتای هەفتایل سەدەی بیس واژوو لەبان بەیاننامەی روانگە کردیە، وەگەرد شێرکۆ بێکەس و کاکە مەم بۆتانی جەلال میرزا و کەریم حسێن عارف ک  کاریگ وەرچەو داشتنە لە گەشداین وە شیعر و چیرووک کوردی، کە وەشوینکەفەیل بەیاننامەی رەوانگە  زاراوە و وشەی مۆدێرن و دەستەواژەی نوو وەکار هاوردن، ئەرا جیاوەکردن زوان شیعر لە زوان ئاسایی و ئاڵشتکاری لە ناوەڕۆک شیعری کردن و فۆرم و ناوەڕۆک شۆڕشگێڕی دروس کردن، و زوور خستنە مل کیچەڵ کۆمەڵایەتی و سیاسیی و هەس مرۆیایەتی و دیاردەیگ دەرکەفت لە شیعریان یاخیبوین کۆمەڵایەتی و یاخیبوین لە دەسەڵات نشان دا، هەرچەن لە سەرەتای بزووتنەوەی ئەدەبییان کەفتنە وەر رەخنەی فرەیگ، بەڵام بازدانیگ چوینیەتی کردن کە سەرەتای خاسیگ لە جەهان شیعر و ئەدەب کوردی دروس کرد.