شون پاگانم له بان ئه‌ێ کاژه‌ێ وه‌فرینه
ئاخرین ده‌رفه‌ت ژینمه تا گوما بام
له ئه‌ولاتره‌ک له چه‌وه‌یلد و
م بێ ناونیشان دڕا بوم
وره‌و کوردستانێگ بێ شون لور.
دی ئۊشم داڵگه واز بار له مورهاوردن شه‌وه‌کیاند
ک زامه‌یلم قوڵپ دانه‌و
م له رواڵه‌ت جنسێگ ده‌م ده‌سی
ژن پێا بۊم.
و ژیان پیپنه‌ک پۊتارێگه
ک کرور کرور کروره
قه‌ڵپه‌نجه داس له فامم و م نافامم و
فام نیه‌که‌م ئه‌ێ گورانی ناخوه‌شه ک
خودا ژه‌نێدن.
کی زانێ؟!
هاتێ خودا زۊتره‌ک له‌ێ وڵاته بانگ گرتۊده وه‌ر و
ک دی خودا وه دیار سه‌ر که‌سه‌و نیه و
م پاڕخه خسێه‌سه‌م و
له‌ێ دیاری پێشته‌ڵپێشته کرژ ئڵاتمه
ک یه په‌نج هزار جاره هه‌ڵه‌پچه له هۊرمانم تووژ به‌ساس و
م هه‌ێمان وه شعره‌گانم *سان له سان کوتم!*
م ره‌وه‌نی نیشتمانێگم
ک جامه‌که‌گانێ له ده‌رۊنم سۊه‌تک سۊه‌تگ دارۊشیه‌ن
م له هۊرچی وڵاتێگم
ک هوره‌چڕه‌گانێ نقڵانه‌ێ مردنێان ده‌ن!
له‌ێ شێواێ شێو په‌ل به‌سانه
شعره‌گانم بۊنه‌سه په‌ت پۊترکێاێ په‌ێکورکه‌ر م
ک م له تخماره‌ێ شعره‌گانمم و
کفرچی گوش خوه‌رئاوا
ک کفن دڕیمه!
ئاخ ! ئاخ ک م ته‌قم کوتیاس داێه گیان!
ک دۊه‌ت ئه‌زره‌ته‌یلم له ناوزگم کورتاژ کردمه‌و
له دلیمازان ئێواره وه‌ختێ په‌ل مه‌رگ کوتم.
ته‌رمم بێه‌ن له شان واهێلان ئێواره
ک له‌شم په‌ڵپ قه‌ورسانه‌ێل دیارێگ ،
دیاربەکرێگ
لیم گرێد!
سۆما ئەمینی