"هونه‌ر گونجياێ" نێچيروان بارزانى: وه‌ دقه‌ته‌و ژنه‌فيه‌ێد

Category: ڕاپــۆرت

Date: 2020-05-09T22:31:48+0000
"هونه‌ر گونجياێ" نێچيروان بارزانى: وه‌ دقه‌ته‌و ژنه‌فيه‌ێد

شه‌فه‌ق نيوز/ جوور هه‌رجار، نێچيروان بارزانى سه‌رۆك هه‌رێم كوردستان، وه‌ وازبوين و ئارامييه‌و گام نه‌ێد و گه‌ردێده‌ شوون روێ وه‌ر هاوبه‌ش ئه‌را وه‌يه‌كه‌وناين ناكووكه‌يل، ده‌س ئه‌كاده‌ بازنه‌داين گووشه‌يل ئه‌را پته‌وكردن خاڵه‌يل له‌يه‌كڕه‌سينه‌وه‌ له‌ناونى دژه‌يل، يا له‌وه‌ر ديدار ناكووكه‌يل وه‌لياو ده‌رانه‌يل گفتگوو و چاره‌سه‌ره‌يل هاوبه‌شيش واز ئه‌كا.

سێيه‌مين ده‌يه‌‌ له‌ دونياى سياسه‌ت ئه‌راى بويه‌سه‌ وانه‌يليگ كه‌ڵه‌كه‌بوێ له‌ "هونه‌ر گونجياێ"، له‌ ڕاشكاوى و ئه‌قڵدارێتى، ده‌رانه‌يل سياسه‌ واز ئه‌كا ك ئه‌را كه‌سه‌يل فريه‌يگ كليل درياێ بويه.

دڵشاد شه‌هاب راوێژكار سه‌رۆك هه‌رێم كوردستان، ئه‌را شه‌فه‌ق نيوز ئويشێد: رۆڵ سه‌رۆك هه‌رێم له‌ باوه‌ڕيه‌و وه‌ زووان گفتگوو و له‌يه‌كڕه‌سينه‌وه‌ سه‌رچه‌وه‌ ئه‌گرێد له‌ چاره‌سه‌ر كيشه‌يل و له‌ كه‌سايه‌تييگه‌ى جياگه‌ى ك پڕه‌ له‌ وه‌رپرسيارێتى.

سه‌ربار ئه‌وه‌گ سه‌ره‌تاى سه‌رۆكايه‌تيكردن هه‌رێمى له‌ وه‌خته‌يليگ ناچارى ناوخوه‌يى و هه‌رێمى سياسى و ئه‌منى هات، وه‌لێ وه‌ل ئه‌وه‌يشا نێچيروان بارزانى تويه‌نست قه‌يرانه‌يل ئاڵشت بكا ئه‌را ده‌رفه‌ته‌يل تازه‌يگ له‌ په‌يوه‌نديه‌يل و ئارامى. ئمجا له‌ يه‌كه‌م سه‌ردانه‌يلى ئه‌را ده‌يشت وڵات سه‌ردان توركيا بوێ ئه‌را ديدار ره‌جه‌ب ته‌يب ئه‌ردۆغان ك بانگهێشت سه‌ردانى كرد له‌ وه‌خته‌يليگ ك په‌يوه‌نديه‌يل وه‌ل ئه‌نقه‌ره‌ روێ له‌ گرژى كردوێد له‌ دوياى راپرسى سه‌روه‌خوه‌يى له‌ هه‌رێم.

له‌ تاران و پاريس و دافوس و شوونه‌يل تر ده‌ركه‌فت، درانه‌ى سياسه‌ت و ئابوورى كوتا، وه‌لێ گرنگتر ئه‌وه‌ بوێ له‌ به‌غدا دوينيايده‌ێ ك وشداريه‌يل ناچارى له‌تى له‌بان عراق ديار بوى وه‌گشتى و له‌بان هه‌رێم وه‌تايبه‌ت، ك هه‌ميشه‌ هه‌وڵ دياد به‌نه‌يل له‌يه‌كڕه‌سينه‌وه‌ وه‌ليا تيكه‌ڵ بكه‌ێد.

ئه‌وه‌سه‌ ئيسه‌يش تا دويه‌كه‌ هه‌ڵه‌په‌ڵه‌ كرد له‌ پيرووزباييكردن له‌ مسته‌فا كازمى له‌بان وه‌ده‌سهاوردن متمانه‌ى په‌رله‌مان و گره‌و له‌بان چاره‌سه‌ر هاوبه‌ش له‌ناونى هه‌ردوگلا ئه‌كاو ئوميد به‌خشێد ئه‌را چاره‌سه‌ركردن دوسيه‌يل چاره‌سه‌رنه‌كرياێ وه‌ل به‌غداو له‌وانه‌يش مه‌سه‌له‌ى بڕين مووچه‌ى كارمه‌نده‌يل هه‌رێم كوردستان.

دڵشاد شه‌هاب ئويشيد: ئه‌گه‌ر كه‌ميگ گله‌و بخوه‌يم ئه‌را گوزه‌يشته‌، دوينيم يه‌كيگ له‌ گامه‌يل گرنگىله‌ دامه‌زرانن حكومه‌ يه‌كگرتگ له‌ هه‌رێم دوياى رميان رژيم وه‌رين عراقى له‌وه‌ختيگ بوى ك هه‌رێم ناڵان وه‌ده‌س بڕيگ كيشه‌يل سه‌خت ناوخوه‌يى و هه‌رێمى، وه‌لێ له‌وه‌ر داشتن سه‌بر فريه‌يگ له‌ چاره‌سه‌ر كيشه‌يل و باوه‌ڕى وه‌ زووان گفتگوو و كار هاوبه‌ش تويه‌نست زاڵ بدێ له‌بان گشت ئه‌و كيشه‌يله‌.

شه‌هاب وت: وه‌و خاتريشه‌ باوه‌ڕم ئه‌وه‌سه‌ سه‌ركه‌فتنى پشت وه‌ دو ستوين بنه‌ڕه‌تى به‌ساگه‌، يه‌كيگيان باوه‌ڕى وه‌ چاره‌سه‌ره‌يل، دويه‌ميش باوه‌ڕ لايه‌ن وه‌رانوه‌رى چ ناوخوه‌يى يا ده‌ره‌كى وه‌ رينمايه‌يلى و نوڕستنه‌يلى، بيجگه‌ ئه‌وه‌ش ك ملله‌ت كوردستان هه‌ميشه‌ چاوه‌ڕى ده‌خاڵه‌ت له‌لى كردياد له‌ چاره‌سه‌ر مه‌سه‌له‌يل ك هه‌رچه‌نى په‌يوه‌ندى راسه‌وخۆيش وه‌پيه‌و نه‌ياشتياد.

نێچيروان بارزانى نه‌ك هه‌ر وه‌ په‌يوه‌نديه‌يل دبلۆماسى هه‌رێمى و ناوخوه‌يى وه‌ته‌نيا له‌وه‌ر خاتر كه‌مه‌وكردن روێ وه‌ر ناكووكيه‌يل له‌ به‌رژه‌وه‌ندى نزيكه‌وبوين وه‌ نه‌ياره‌يل و وه‌ده‌سهاوردن ده‌سكه‌فته‌يل ئابوورى ئه‌را هه‌رێم، به‌ڵكوو وه‌ ئازايه‌تى تايبه‌ت خوه‌يشى چه‌كه‌يلى هاوردياده‌ كار له‌ ئداره‌ى ناكووكى و قه‌يرانه‌يل.

وه‌ل گشت ئه‌وانه‌يش، ميراته‌ بنه‌ماڵيه‌گه‌ى ك‌ هيز ديانه‌ ئاماده‌بوينى، ك نه‌وه‌ى مه‌لا مسته‌فاى بارزانيه‌و كوڕ ئدريس بارزانى ئه‌ندازيار شۆڕش كورده‌.  

وه‌ى جووره‌ چيه‌ ناو دانايى هونه‌ر سياسه‌ت ك زانسته‌گه‌ى له‌ زانكۆى تاران وه‌ده‌سهاورد، ئمجا له‌ زانكۆوه‌ ئه‌را چالاكى سياسى و ئه‌را حزب و دوياى ئه‌وه‌يش ئه‌را حكومه‌ت هه‌رێم و دوياجاريش ئه‌را سه‌رۆكايه‌تى، ك چيه‌ پايه‌يگ هه‌ر بويشێد كه‌سه‌يل تر گووش له‌لى ئه‌گرن و ئه‌گه‌ريش پيشنيازيگ بكا وه‌ دقه‌ته‌و گووش له‌لى ئه‌گيريه‌ێد.

وه‌رجه‌ رووژه‌يليگ، جه‌خت له‌بان يه‌كڕزى ناونى هه‌ردوگ حزب پارت ديموكرات و يه‌كێتى نيشتمانى كرد، دوياى ئه‌و كيشه‌ى ئه‌منيه‌ ك روێدا له‌ "زينى وه‌رتێ" له‌ پاريزگاى هه‌ولێر. وت ئه‌وان هاوبه‌شن.

وه‌ى جووره‌ ئه‌را نموونه‌ نێچيروان بارزانى بازنه‌ى گرژى له‌ناونى دژه‌يل شكنێد و كار له‌بان يه‌كڕزى ماڵ كورد ئه‌كا.

دڵشاد شه‌هاب باسكرد و وت: يه‌كيگ له‌و ئه‌ركه‌يله‌ ك سه‌رۆك هه‌رێم رۆل له‌تى ديرێد و له‌ هه‌مان وه‌خت كۆمه‌ڵگاى كوردسانى يه‌كخستن ماڵ كورده‌و له‌ هه‌مان وه‌ختيش باوه‌ڕ ديرێد وه‌ى كيشه‌و باوه‌ڕيشى ئه‌وه‌سه‌ سه‌رۆكايه‌تى هه‌رێم بدێده‌ ماڵيگ ئه‌را گشت پيكهاته‌يل وه‌گشت شيوازه‌يليان و چه‌نه‌ها دانيشتنيش ئه‌را گشت لايه‌نه‌يل كوردستانى له‌ ماوه‌ى گوزه‌يشت ريكخست.

دوياى ده‌ركه‌فتن چه‌ندين كيشه‌و چه‌ن كاره‌يليگ ره‌ساننكارانه‌ له‌ناونى هه‌ردوگ حزب پارت ديموكرات كوردستان و يه‌كێتى نيشتمانى كوردستان و ئاشكراكردن ئاماده‌بوين هه‌ردوگلا ئه‌را دانيشتن له‌بان مێز گفتگوو، شه‌هاب وت: له‌ى حاڵه‌ته‌ بايه‌سه‌ لايه‌ن سێيه‌م بدێ رۆڵ نزيكه‌وكردن داشتوود، ك هه‌ردوگلا باوه‌ڕيان ئه‌وه‌سه‌ ئه‌و كه‌سه‌و شوون گونجياگتر سه‌رۆكايه‌تى هه‌رێمه‌، ك ماڵ گشتلايگه‌و گشتلايگيش كووكن له‌بان ئه‌وه‌گ سه‌رۆكايه‌تى هه‌رێم چادريگه‌ گشتى له‌تى گرده‌و ئه‌دێ، هه‌ر وه‌و خاتريشه‌ دوياى ئاماده‌بوين هه‌ردوگلا ئه‌را گفتگوو، ريزداريان داواى دانيشتنيگ كرد وه‌سه‌رپه‌رشى خوه‌ى و ئه‌نجامداين ئه‌و رۆڵه‌ له‌ چوارچيوه‌ى زاڵبوين له‌بان كيشه‌يل ناوخوه‌يى و ريكخستنه‌وه‌ى په‌يوه‌نديه‌يل له‌ناو ماڵ كوردستانى.

له‌باره‌ى قه‌يرانيش له‌ناونى به‌غدا و هه‌ولێر، شه‌هاب وت: كيشه‌يل به‌غدا ك هه‌رچه‌نى وه‌ په‌يوه‌ندييگ راسه‌وخۆ نه‌دێ وه‌ل هه‌رێم، وه‌لێ سه‌رۆك هه‌رێم باوه‌ڕى ئه‌وه‌سه‌ به‌شيگه‌ له‌ كيشه‌يلمان و هه‌ر كيشه‌يگ له‌ به‌غدا كاريگه‌رى ديرێد له‌بان هه‌رێم.

شه‌هاب هه‌ميش وت: ئه‌را نموونه‌ هه‌ناى ك بارودوخ سياسى گرژى په‌يا كرد و خوه‌ينيشانداين دژ حكومه‌ت ناوه‌ند كريا له‌ ناوڕاس و باشوور وڵات له‌ ئوكتۆبه‌ر/ ته‌شرين يه‌كه‌م گوزه‌يشت، ريزداريان مامڵه‌ وه‌ل كه‌س راسه‌وخۆ كرد له‌ حكومه‌ت عراقى وه‌ ئه‌وه‌گ په‌يوه‌ندى وه‌ هه‌رێمه‌و ديرێد. ريزداريان باوه‌ڕى ئه‌وه‌سه‌ نه‌بايه‌د عراق له‌ گرژى بژيه‌ێد و هه‌رێم دوير بدێ له‌لى يا وه‌چه‌واشه‌وه‌، هه‌ر وه‌و خاتريشه‌ هه‌ميشه‌ وتاره‌يل سه‌رۆكايه‌تى هه‌رێم له‌ كيشه‌يل په‌يوه‌س وه‌ به‌غدا جه‌ختكردنه‌ له‌وه‌گ كيشه‌يل عراق كيشه‌يلمانه‌و وه‌ دو ديد جياوازه‌و ته‌ماشاى ناكه‌يم و هه‌ر له‌ سه‌ره‌تاى ده‌سوه‌پيكردن هه‌وڵه‌يل دامه‌زرانن حكومه‌ت تازه‌ هه‌وڵ ئه‌وه‌ دا بدێده‌ ئامانج يه‌كه‌م دامه‌زرانن حكومه‌ت ئه‌را په‌ڕاننه‌وه‌ى قۆناغ سه‌خت و قه‌يران و حكومه‌تيگ نيشتمانى و زامنكه‌ر شايسته‌يل ده‌ستوورى و ياسايى ئه‌را گشت پيكهاته‌يل عراقى.

شه‌هاب دوياجاريش وت: گرده‌وكردن گشت ئى كاره‌يل بنه‌ڕه‌تيه‌ ئه‌را سه‌ركه‌فتنى متمانه‌داشتنه‌ وه‌خوه‌ى و وه‌ لايه‌نه‌يل تر وه‌پى و ملله‌تيش باوه‌ڕى ئه‌وه‌سه‌ ريزداريان كه‌سيگ سه‌ركه‌فتگ و باوه‌ڕيش ئه‌وه‌سه‌ يه‌يش له‌ به‌خت خاس هه‌رێمه‌ ك گشت ئى كرده‌وه‌و سفه‌ته‌يله‌ له‌ كه‌سيگ جوور نێچيروان وجوود داشتوود.

related