كارزان عەبدولرەحمان موڕاد وه‌مەرج کوردبوین

Category: ڕاپــۆرت

Date: 2020-05-15T18:50:22+0000
كارزان عەبدولرەحمان موڕاد  وه‌مەرج کوردبوین

شه‌فه‌ق نیوز/ كارزان عەبدولرەحمان موڕاد ، یەکیگە لە روشنهویرەیل کوردستان وشار خانەقین، وەردەوام خەریک خوەنستن و نویسینە. ناو ته‌واوی کارزان عەبدولڕەحمان موڕاد له‌ داڵگ بوی خانەقینه‌ ساڵ ١٩٥٤ . ‌ ‌ئاژانس شەفەق نیوز، ئی چەوپێکەفتنە وەگەردی ئەنجام دا.
شەفەق نیوز: ئیمە زانیمن لەناو خانەقین ناسریایده‌ وە کارزان عەبدولڕەحمان بۆی، ولە بڕیگ شوین خوەد ئەو نازناوە ( بۆی) ئاشکرا کردیدە، ئایا ئەرا (بۆی)؟.
کارزان: چوینکە باوگم خدمه‌تكار ئینگلیز بوی، وەپی وتیان ( بۆی)، من شانازی وە مێژو خوەم دیرم، وشانازی وە باوگم دیرم ک نەوکەری کردیاد تا نانیگ ئەرا مناڵەیلی دابین بکەێد، لەلایگ تریش، ئیسە ک ناوم کارزانە، ئەو ناوە نیە ک وەخت لەدایگ بوینم بڕینەی باڵام، چوینکە ناو خوەم ئیسەی خوەمە، توێەنم ئیسەی خوەم وگورەی ئارازوو توانای خوەم ئاڵشت بکەم، بەڵکم مێژو هەر جوور خوەی بایەسە بمینێد، وەبی دەسکاری، وبایەسە هەر جوور خوەی باسی بکەێد.
شەفەق نیوز: ئیسە ماڵد هاکاملا؟
کارزان: ئیسە ماڵم هالە ئەمریکا، لە شار ویتلاند نیشتمە، وەلی چەوەڕی دەرفەتیگ کەم بامەو وەرەو زێدو میلكانم .
شەفەق نیوز: جوور دانیشتویگ ئەمریکا، کوردستان لەلادەو چەس؟
کارزان: کوردستان سینەمە ک وەپی هەناسە دەم، وەبی ئەوە ژیانم تەواو بوود.
شەفەق نیوز: لە باوەت زوان و قسەکردن ئایا چوین لە ئەمریکا گوزران کەێد؟
کارزان: توانای قسەو نویسانن لەی زوانەیلە دیرم؛ ئینگلئزی، روسی، تورکی، فارسی، ئازەری، بیجگە کوردی و عەرەوی .
شەفەق نیوز: خوازیمن باس بەرهەمەیلد ئەرامان بکەێد لە نویسانن وچاپکردن.
کارزان: بڕیگ کتاو چاپ کردمە، وبڕیگیش ئامادەیە ئەرا چاپکردن، و چەن باوەتیگ هالە ژیر دەسم خەریک تەواوکردنیانم، فرەیان وەزوان عەرویە وه‌ی ناوه‌ێله‌:
١/ ئەنسکلۆبیدیای مێژۆی کوردستان.
٢/ سادەیی و وڕگی لە عەقڵەیت کورد ( فەلسەفەی زانست کۆمەڵایەتی)
٣/ باوەڕ و یاسا لە فەلسەفەی زەڕادەشت، ( تۆیژینەوی فەلسەفی) لە دمەشق چاپ کریاگە.
٤/ میسۆلۆجیای کورد ( تۆژینەوە لە ئەفسانەگان) لە لاین دارل ئیبداع چاپ کریاگە.
٥/ بڕیگ لە کورتە چیرۆک وە ناونیشان ( تەپەگە)
٦/ وەرگێڕان بڕیگ چیرۆک لە زوان روسی ( سایەیل بوور) ئەرا نوسەر روسی (قیستەنتین ئۆگستین).
٧/ پەیوەندەگانیان و پەیوەندیگانمان، (تۆژینەوەی کۆمەڵایەتی).
٨/ بڕیگ تۆژینەوەیل مێژوی لە باوەت وادی رافیدەین ومەردمەیل و گەلەیل ناوی.
٩/ بڕیگ کورتە چیرۆک وەناونیشان خراوی روزگار.
١٠/ بڕیگ کورتە چیرۆک ئامادەی چاپکردنە وە ناونیشان ( ئەڵوەن ژانەیل خوەی دیرێد)
١١/ بڕیگ کورتە چیرۆک وەزوان کوردی وەناونیشان ( زەخمەگان سارێژ نیەون).
١٢/ رۆمانیگ وەناونیشان ( چایخانەی ئەبو شوکر) وکوردی و وەعەرەوی.
١٣/ رۆمانیگ وەناونیشان ( داناگان) وەکوردی وعەرەوی چاپ کریاگە.
١٤/رۆمانیگ وەناونیشان (پاسەوان) یا ( بودی گارد) ئامادەیە ئەرا چاپ
١٥/ رۆمانیگ وەناونیشان ( پەرویزخان ویاد مناڵی) ئامادەیە ئەرا چاپ
١٦/ رۆمان (مەملەکەتی مایە پەڵنگەیل) ها ژیر دەس
١٨/ (سای گیان) ئامادەیە ئەرا چاپ
١٩/ (شەیتانەیل زەوی شەیتانەیل ئاسمان) رۆمانیگە هاژیر دەس.
٢٠/ (لانەیل سیپرسنەک) رۆمانیگە هالە ژیر دەس.
٢١/ نوسینیگ لە فەلسەفەی فیزیا وەناونیشان ( فەلسەفەی قەرەبووی) ئامادەیە ئەرا چاپ.
٢٢/ کتاویگ وەناو ( رەفتار هاوڵاتی خوەرهاڵات ناوڕاسی) ئامادەیە ئەرا چاپ.
٢٣/ کتاویگ وەناو ( ئەفسانەیی لە مەتەڵ کوەرد) ئامادەیە ئەرا چاپ.
٢٤/ زەنجیرەیگ وتار سیاسیو رخنەییو فەلسەفیو کۆمەڵایەتی.
٢٥/ زەنجیرەیگ وتار لە رخنەی هەنەکی وەناونیشان ( خەودیم) لە ٦ بەشە.
٢٦/ دوو کتاو شعر بەڵاچە، کوردی و عەرەوی.
شەفەق نیوز: بەرهەمەیلد فرەن ورەنگینن و گرنگن، ئەرا فرەیان وە زوان عەرەویە؟
کارزان: خوازم وە نویسانم وە زوان عەرەوی ئەدەب وروشنهویری کورد بڕسنمە فرەترین هەژمار خوەنەوارەیل بیگانە.
شەفەق نیوز: ئایا ئەدەب کوردی چە خوازێد؟
کارزان: ئەدەب کوردی هاندان خوازێد، و وەرگیڕان نوسراوەگان ئەرا زوانەیلیگ تر وە ئەمانەتی خوازێد، و کەسەیلیگ خوازێد نوسراوەگان بکەنە ئەرشیف.
شەفەق نیوز: ئی زوانەیلە ک هوکارەیان بویدە، وئی باوەتەیلە ک لەلیان نویسایدە، هەڵبەت ئەزمون وخوەنستنەیلەگ هانە شوینیان، ئایا کەمیگ باسیان ئەرامان کەێد؟.
کارزان: لە باوەت هوکارەبوینم من ئەیانە خوەنستمە؛ لە کولێژ هینری فۆرد ( کەمپیوتەر وزانیاری) ، و بەکەلۆریۆس فەلسەفەی کاڵیفۆڕنیا، ماستەر فەلسەفەی کاڵیفۆڕنیا، دکتۆرای فەلسەفەی کاڵیفۆڕنیا.
لە باوەت ئەزمون من وەی کارو شوینەیلە پەیوەندی دیرم؛ ک ئەندامم ل یەکێتی ئەدیبان و نوسەران عیراق، کۆمەڵگەی عیراقی ئەرا ماف مرۆڤ، باڵوێز ئاشتی لە رێکخراو باڵوێزان ئاشتی سەروە نەتەوەیل یه‌ك گرتگ لە ساڵ ٢٠٠٦ . لە باوەت ئەزمون، من یەکیگم لە کوردەیل شار خانەقین، واتە ئاوارەو زیندانو ستەمو دەروەدەری وڵاتەیل و هەوڵدان ئەوزەڵکردن لە ژیان و بڕیگ واتەیل تر، ک گشت کوردیگ دیەسەی، وگشت خانەقینییگ دیەسەی، وەمەرج کوردبوین. ئەر ئه‌وە دوینم گشت کوردیگ ئەزمون گەورایگ دیرێد، وەلی گشتی دەرفەت سود وەرگردن لە ئەزمونەیلی وەدەسی نیەکەفێد، ئەگەر ئەزمون گشت تاکە کوردیگ بوودە لاپەڕەیگ، کورد کتاویگە ک ئاسمان لە چەو جیهان شاریدەو.
شەفەق نیوز: وەڕاسی قسەیلد و بەرهەمەیلد جی شانازیە، و ئیمەیش وەناو ئاژانس شەفەق نیوز دەسخوەشی گەرمیگ لەلید کەیمن، وئومیدمان یەسە ک هەمیشە سەرکەفتگ بوید.

related