ئەی رەقیب چڕیاد، لە ریەگەی وەرەو سێدارە

Category: ڕاپــۆرت

Date: 2020-05-13T21:05:20+0000
ئەی رەقیب چڕیاد، لە ریەگەی وەرەو سێدارە

شەفەق نیوز/ هەرچەن یە زیاتر لە چل ساڵە 'گوزه‌ری لەبان کۆچەگەی، هیمان کورد یاد لەیلا قاسم جوی سومبلیگ زینگەو کەێد. ک ریژیم بەعس لە سێدارەیدا لە ١٢ ئایار ١٩٧٤.
لەیلا سومبلیگە لای بزوتنەوەی نیشتیمانی کورد، ك سێدارەدریا، ولە نەجەف وەخاک نریا.
خوەشک ئی خەباتکارە داوا کرد دووارە تەرمەگەی لە هەولێر وەخاک بسپارن.
سەبیحە قاسم وت؛ زەوی هەولێر گونجیاگ ترە جوی باوه‌شێگ ئەرا لەیلا، وهیوای هاوردنەوەی لەنەجەفەو دیریمن، وەگورەی راپۆرتیگ بڵاوەکریاگ لەلاین سایت تایبەتیگ وە زینگکردنەوەی یاد کورد "KMP".
لەیلا لەوەختیگ کورد خەریک شۆڕش بوین لەلاین ریژیم عیراق لەسێدارە دریا.
لەیلا ک ئەندام پارتی دیموکراتی کوردستان بوی، خوەنەوار زانکۆی بەغداد بوی، ئاشكرا كریا هه‌نای له‌ شانەیگ نهێنی لەبەغداد کار کردیاد ، تا ئاگەدار مەردم بکەێد چە بوود لە لاین کورد.
لەیلا لە کانون یەکەم ١٩٥٠ لەدایگ بوی و لە خانەقین گەورا بوی ، کوردیگ پشتگیر پارتی دیموکراتی کوردستان وە سەرۆكایه‌تی مەڵا موستەفا بارزانی بوی.
لە ٢٩ نیسان ساڵ ١٩٧٤ هێزە ئەمنیەگان لەنیمەی شەو چینه‌ ناو ماڵ خیزانەگەی لە بەغداد ، ک سەبیحە ئی شەوە وە خاسی ها لە هویری، وەختا پۆلیس نهێنی داوا لەلیان کرد لەدەیشت ژوور خەفتنەگەی چەوەڕی بکەن، ماڵئاوایی لە خیزانەگەی کردو وت؛ توانەم چوینکە من کوردم .
دویای ئەوە بردنەی ئەرا بنکەی ئەمن، ک لەورا بڕیار زندانیکردنی لە ئەبو غرێب وەتومەت تیرۆرست لەو وەختە، ٤ خوەنەوار کورد وەلیەو بوین ئەوانیش؛ حەسەن حەمات رەشید، ئازاد میران، نەریمان ماستی، جواد هەماوەندی. ک دەسڵاتەیل تومەتباریان کردن وەدانان بۆمبێگ لە سینەما.

دویای دادگایكردنیگ وه‌ رواڵه‌ت، لە ١٢ ئایار ١٩٧٤ ، دەسڵات فه‌رمان لەسێدارەدانی ده‌رکردن ، ک ئەو وەختە تاوانبار سەدام حسێن پیاو دوویەمین حکومەت عراق بوی.
خیزانەگەی باس کەن، ک سەدام دەرفەت خوەنستن لەدەیشت عیراق داویدە پی ئەگەر لە کار سیاسی و کەیس کوردی واز بارێد، ئەوە ک لەیلا رەتی کرد.
ئەوە ک دەربارەی لەیلا باسی کریەێد، ک خوه‌ی یەکمین چالاکوان سیاسی لە خوەرهەڵات ناوڕاس بویە ک لەوەخت خوەی له‌سێدارە بدریەێد، خوەیشی خەریک چڕین سروود ئەی رەقیب بوی، لە ریەگەی وەرەو پەت سێدارە.

related