وه‌زاره‌ت كار پرۆسه‌ێ ئامارگیری مه‌یدانی ئه‌ڕا كومه‌ككردن ئه‌نجام ئه‌یا

Category: هــــه‌واڵ عــیراق

Date: 2015-05-24T14:09:53+0000
وه‌زاره‌ت كار پرۆسه‌ێ ئامارگیری مه‌یدانی ئه‌ڕا كومه‌ككردن ئه‌نجام ئه‌یا
وه‌زیره‌گه‌ له‌ كونگره‌ێ ڕوژنامه‌گه‌ريێگ له‌ باره‌گای وه‌زاره‌ته‌گه‌ ئه‌وه‌یش خستگه‌سه‌ ڕوێ پروسه‌ى كۆمپیوته‌ری تازه‌ێگ ئه‌ڕا ئه‌وانه‌گ شایان كومه‌ك كردن ده‌س وه‌پێ كردگه‌ و له‌ ڕێ تیمه‌یل توێژه‌ره‌وه‌یل كومه‌ڵاێه‌تی ئه‌و خانه‌واده‌یله‌ ئه‌ڕا كومه‌ك له‌ به‌غدا و پارێزگاگان ناو نوێس ئه‌كریه‌ن ك شایان كومه‌ك كردنن.

وه‌گوره‌ێ به‌یاننامه‌ێ وه‌زاره‌گه‌ ك كوپیێگێ ئه‌ڕا (شه‌فه‌ق نیوز) كل كریاگه‌ ، ئه‌و توێژه‌ره‌ویل كومه‌ڵایه‌تیه‌ مه‌شق وڕاهێنان وه‌پیێان ئه‌كریه‌ێ له‌ باوه‌ت چوێنیه‌تی پڕه‌و كردن ئستماره‌یل تایبه‌ت وه‌ شمول و سروشت كار وه‌ل ئه‌و خانه‌واده‌یله‌ ك سه‌ردانیان ئه‌كرێ.

وه‌زیره‌گه‌ باس ئه‌وه‌یش كردگه‌ ك پروسه‌ێ له‌یه‌كه‌وداین نیشانداگه‌ (8551) فه‌رمانبه‌ر حكومه‌تی له‌ وه‌زاره‌گه‌ كومه‌ك ناڕه‌وا وه‌رگردنه‌، وه‌لێ ئه‌و پویله‌یله‌ ك وه‌رێ گردنه‌ له‌لیان ئه‌سینریه‌ێگه‌و.

سودانی ئاشكرای كردگه‌ ك تیمه‌یل توێژه‌ره‌وه‌یل كومه‌ڵاێه‌تی له‌ ژماره‌ێگ توێژه‌ر كومه‌ڵایه‌تی پێك ئه‌یه‌ێ ك گریبه‌س دو مانگه‌ وه‌لیان ئمزا كریاس و ده‌س ئه‌كه‌نه‌ كار مه‌یدانی ئه‌ڕا پڕه‌و كردن ئستماره‌ ئه‌ڕا ئه‌و كه‌سه‌یله‌ ك شایان كومه‌ك كردنن.

سودانی له‌ حكومه‌ته‌یل مه‌حه‌لی و ده‌زگا حكومیه‌گان و ئه‌نجومه‌نه‌یل مه‌حه‌لی و ڕێكخراوه‌یل كومه‌ڵگاێ مه‌ده‌نی داوا كردگه‌ پشتگیری و كومه‌ك تیمه‌یل مه‌یدانی وه‌زاره‌گه‌ بكه‌ن تا پروسه‌گه‌ له‌ به‌غدا و پارێزگاگان وه‌ خاسی جیوه‌جی بكریه‌ێ.

زیاتر وتگه‌: ده‌سه‌ێ پاراستن كومه‌ڵاێه‌تی ده‌س كردیه‌سه‌ مه‌شق وه‌پێكردن توێژه‌ره‌یل كومه‌ڵاێه‌تی ك گرێبه‌س وه‌لیان ئمزا كریاگه‌ تا ده‌س بكه‌نه‌ كار مه‌یدانی له‌ به‌غدا و پارێزگاگان ، وه‌یه‌یش ئشاره‌ كردگه‌ توێژه‌ره‌یل كومه‌ڵاێه‌تی له‌ بان بنه‌واێ توانایی و پێشه‌یی هه‌ڵوژیانه‌ و ته‌نیا له‌ به‌غدا (460) توێژه‌ر پروسه‌گه‌ جیوه‌جی ئه‌كه‌ن.

وه‌زیر كار و كار وبار كومه‌ڵاێه‌تی عراق له‌ سه‌رجه‌م هاوڵاتیه‌یل داوا كردگه‌ ، زانیاری دروس بێه‌نه‌ تویژه‌ره‌ كومه‌ڵاێه‌تیه‌گان له‌وه‌ر ئه‌وه‌گ به‌راوردیان وه‌ل ئه‌و زانیاریه‌یله‌ ئه‌كرێه‌ێ ك له‌ لاێه‌نه‌یلتر ئه‌ڕه‌سێگه‌ وه‌زاره‌گه‌.

  

related