کوڵە چیرووک

کوڵە چیرووک
2023-05-28T11:22:14+00:00
خاڵوو نامی، چوار شانە و وەرەن پووز، تەنگ زین قاترەگەی تنەو کرد و وەت: 

ژنەگە دێرە، هەرچێ کەشک و ڕۊن دیڕی، بنەرانە ناو هەگوەگە...

تاتی فانووس، بل و باریک و سیە و خوەش دیمەن، وەت:

کوتر نووەگەد بکە وەر، ئەڕا شار چید ، بەنامی دێری...

لە هەر سیەماڵێگا دەنگێ هات..

زایر وەت:

مێرزا نامدار، چوار مەن قەن وە سەر شەرت شوان ئەڕام قەرت بکە!

خاڵو دەوریش وەت:

نامدار، دو مەن خوای تەورزە ئەڕا منیش بار...

نامدار هەر جوور جاران بێدەنگ وساۊد و نە ئا وەت و نەیش نە!

گووشێ پڕۊ لەی قسیەیلە و ئەڕا هۊچ کەس هۊچ ناورد و دڵ کەسیش نەشکان، نە لە دەمی دەر نات و کار کەسیش ئەو ڕێ نەخس..

هەر لەی ئانە، مناڵێ چەوزاخ و لۊت کوڵ، وە پای پەتی، وە توو شەۊ، لەرزی و ڕکیا و وەت:

خاڵو نامی، یە پەنج تمەن، گیان یەی کوڕەگەد، شۊتێ ئەڕام بار..

خاڵو نامی، پەنج تمەن لە دەس مناڵ سەن،سافێ کرد و نایەی لە گیرفان وەرقەو کوترەگەی و وەت:

ڕوڵە ت لە ئەلانا پف بکە لە شۊت خوەد!

گەپ و کار° م°، ئامانەت نەختە نە قەڕت و دروو و دەلەسە...

فەرهاد عزەتی زادە

Shafaq Live
Shafaq Live