رویداوەیلیگ جیاجیا...مردن پیاو و مناڵیگ و زەخمداری چوار کەس لە دیالە

سەرچەوەگە وە ئاژانس شەفەق نیوز وت، پیاویگ پەنجا ساڵان لە مەرافیگ کوشیاگە لە گەرەک گاتون لە خوەرئاوای بەعقوبە، وتیش مەرافەگە لەمابەین کۆمەڵەیگ لە کەسە نزیکەیل دروسبویە و هیزەیل ئەمنی لە شوین رویداوەگە ئامادەبوینە و رێکارەیل پێویست وەرگردنە.

لە رویداویگتر سەرچەوەگە وت، مناڵیگ سێ ساڵان گیان لە دەسدایە لە ئەنجام کەفتنی لە بەرزایی ماڵیان لە ناحیەی عزێم ، دیاریکرد" تەرم مناڵەگە ئەرا پزیشک دادوەری کلکریاس، و دەسڵاتدارەیل ئەمنی لێکۆڵینەوە لە رویداوەگە وازکردنە.

لە رویداو سێیەم وەپای هەمان سەرچەوە، چوار کەس لە یەک خیزان تویش زەخمداری سەختیگ بوین وە لەیەکداین ماشیانیان وەگەرد مادەیل بیناسازی، ک وەلای شۆستەی جادەی (بەغدا کەرکوک)  لە دیالە دانریاوێد  ئەرا کارەیل دروسکردن شۆستەی جادەگە.