م دووسد دێرم

م دووسد دێرم
2023-05-21T11:19:59+00:00
م دووسد دێرم

ئه‌وقره‌ گ تیر که‌مان ئاره‌ش بچوود

چه‌نه‌ زوور بازوو ڕووسه‌م

چه‌نه‌ پاکی خۊن سیاوه‌خش

شایه‌دی فێشتر....

م دووسد دێرم

چه‌نه‌ گڕه‌ی دڵ داڵگ ئه‌ڕا کوورپه‌

چه‌نه‌ سه‌رسەختی باوگ،

قه‌د ته‌ره‌ک ته‌ره‌که‌یل بان پووس ده‌سێ

شایه‌دی فێشتر....

م دووسد دێرم

چه‌نه‌ تامازرووبۊن مناڵ ئه‌ڕا ئه‌سپاوبازی

ئەڕا‌ وه‌یلکان و تاوه‌تاوه‌..

تا ئاخرین شماره‌ گ زانی

هه‌فت گله‌ نوو گله‌

شایه‌دی فێشتر....

م دووسد دێرم

چه‌نه‌ زکره‌یلێ گ داپیرم هه‌ر ڕووژ خوه‌نێ..

چه‌نه‌ ‌‌حرمه‌ت باپیرم،

وه‌ ئه‌نازه‌ێ دڵپاکی مه‌ردم ئه‌وسا

شایه‌دی فێشتر....

م دووسد دێرم

چه‌نه‌ وه‌هار و خونچه‌ی په‌لوپوو داره‌یل..

قه‌د هڵم گه‌رمای تاوسان،

چه‌نه‌ زوور وای پاییز و سه‌ردی زمسان

شایه‌دی فێشتر....

م دووسد دێرم

چه‌نه‌ قوڵپه‌قوڵپ ئاو کیه‌نی وه‌ر ماڵه‌یل

چه‌نه‌ هوونکی ئاو کونه‌..

جوور ده‌ڵنشینی ساڕوکی کووڵا

شایه‌دی فێشتر.....

م دووسد دێرم

چه‌نه‌ بێقه‌راری ئایەم چه‌وه‌ڕێ

چه‌نه‌ هۊردبۊن ئایەم دڵشکیای..

قه‌د سه‌ختی دڵکه‌نین و دڵبڕین

شایه‌دی فێشتر...

م دووسد دێرم

تا هه‌ور، تا ئاسمان

تا ئه‌وره‌ گ نه‌ که‌سێ دییه‌ نه‌ شنه‌فتێیه‌..

تا هه‌ناز خودا

شایه‌دی فێشتر....

م دووسد دێرم..

م دووسد دێرم...

سەید یونس هاشمی

لە کتاو "وە دۊرەو نەنیش"

     

Shafaq Live
Shafaq Live