شه‌فه‌ق نيوز/ په‌يجووريگ دريژ ك رووژنامه‌ى "تايمز" بريتانى ئاشكراى ئه‌وه كرد ك كومپانيايه‌يل گه‌ورا رۆل ديرن له ته‌مويلكردن ريكخرياگه‌يل ترۆريستى و له‌وانه‌يش ريكخرياگ داعش وه مليۆنه‌ها دۆلار، ئه‌ويش له‌ڕى ئعلانكردن له‌بان ماڵپه‌ڕه‌يل ئه‌و ريكخرياگه‌يله يا لاپه‌ڕه‌يل په‌يوه‌ندى كۆمه‌ڵايه‌تى په‌يوه‌س وه پييان.
رووژنامه‌گه وت: ئعلانه‌يل ده‌يه‌ها له‌و كومپانيايه‌يل گه‌وراى جه‌هانيه‌و له‌وانه‌يش كومپانياى "مارسيدس بنز" و"جاغوار" و"هۆندا" ى دروسكردن سه‌ياره و "ويتروز" بريتانى و كومپانيايه‌يل تر له‌بان ماڵپه‌ڕه‌يل تايبه‌ت وه ريكخرياگه‌يل تونڕه‌و ده‌رئه‌كه‌فێد، يا له‌بان لاپه‌ڕه‌يلى له ماڵپه‌ڕ "يوتيوب" ك ئه‌و ريكخرياگه‌يله داهات ئه‌و ئعلانه‌يله ديرن.
ئى ئعلانه‌يله شايه‌ت مانگانه ده‌يان هه‌زار دۆلار ئه‌را جه‌ماعه‌ته‌يل تونڕه‌و جوور ريكخرياگ داعش و ئه‌لقاعيده يا كومبات 18 بارنه ده‌س ك جه‌ماعه‌تيگ تازه‌ى نازيه و بانگه‌واز تون و تيژى ئه‌كا.
ئه‌را نموونه: ده‌ركه‌فتن ئعلان ئه‌را كومپانيايگ له‌بان ڤيديۆ ته‌رويجى ئه‌را(داعش) قانجازى ئه‌را ريكخرياگ ترۆريستى 7،6 دۆلاره ئه‌را هه‌ر هه‌زار دوينستنيگ، يه‌يش له‌وه‌ختيگ ك بڕيگ گرته‌ى وێنه‌گرياگ فيشتر له يه‌ك مليۆن كه‌س ديه‌سه‌ى.
وه‌ل ئه‌وه‌يشا بڕيگ له ئاژانسه‌يل تومه‌تار ئه‌و ئعلانه‌يله ئه‌كه‌ن ك سه‌ركردايه‌تى هه‌ڵمه‌ته‌يل نوێنه‌رايه‌تى ئه‌كه‌ن له‌جياى ئه‌و كومپانيايه‌يل ئعلانكردگه، ئه‌ويش وه ئه‌وه‌گ وه ماركات بدريه‌ێد ئه‌را ئعلان له‌بان ئه‌نته‌رنێت وه‌خاتر قانجازكردن.
ئمجا هه‌رچه‌نى كومپانيايه‌يل ئه‌نته‌رنێتيش هه‌وڵ ئه‌يه‌ن ئه‌را نواگيرى له ده‌ركه‌فتن ئه‌و ئعلانه‌يله ك ته‌مويل جه‌ماعه‌ته‌يل تونڕه‌و له‌تى دياره، وه‌لێ وه‌ل ئه‌وه‌يشا "تايمز" چه‌وديرى گشت ئه‌و ئعلانه‌يل"مارسيدس بنز" و"جاغوار"ه كردگه وه‌ل گرته‌ى ڤيديۆ ئه‌را گورانييگ ته‌رويجى ئه‌را داعش.
بيجگه ئه‌وه‌يش ئعلانه‌يليگيش ئه‌را كومپانياى "ساندلز ريزورتس" گه‌ورا ده‌ركه‌فت ك يه‌يش په‌يوه‌سه وه گه‌شته‌يل گه‌شتيارى، ئه‌ويش وه‌ل گرته‌يگ ڤيديۆيى ئه‌را جه‌ماعه‌ت جايه‌ڵه‌يل سۆماڵى ك په‌يوه‌سن وه ئه‌لقاعيده.
ئمجا قسه‌كه‌ر وه‌ناو مارسيدس بنز ئه‌را رووژنامه‌گه وت: كومپانياگه داوا له‌و ئاژانسه‌يل ئعلانه‌يله كردگه ك مامڵه وه‌ليانا ئه‌كا خوه‌يان بكيشنه‌و يا ئعلانه‌يلى له‌بان كومپانياگه ده‌رنه‌كه‌فێد.
هه‌ر له هه‌مان باوه‌ت قسه‌كه‌ر وه‌ناو "ساندل ريزورتس"يش كومپانياگه گشت هه‌وڵيگ ئه‌ياد ئه‌را نواگيرى له ده‌ركه‌فتن ئعلانه‌يلى و ئاماژه وه‌يه‌يش كرد ك "يوتيوب" ته‌سنيف ئه‌و گرته‌يل ڤيديۆييه ناكا ك باس تونڕه‌وى ئه‌كا جوور گرته‌يليگ زه‌ره‌دمه‌ن.