شه‌فه‌ق نيوز/ شيه‌وكردن تازه‌يگ ئه‌وه ده‌رخست ك ريكخرياگ ترۆريستى داعش ژنه‌يل فيشتريگ ئه‌يه‌رێده كار له مه‌يدانه‌يل جه‌نگ، ئه‌ويش دوياێ له‌ده‌سداين شماره‌ێ فريه‌يگ له پياوه‌يل چه‌كدارێ له‌ى جه‌نگه‌يل دوياخره.
ئه‌و شيه‌وكردنه ك كومپانياێ " IHS Markit" ئه‌نجامى داگه، ئه‌وه ده‌رخست و وت: ئه‌وه‌گ داعش ئه‌نجامى داگه ئاڵشتكارێ فريه‌يگ له‌لێ كه‌فته‌سه‌و، له‌وانه‌يش: ئه‌و ريكخرياگه ديد وه‌رته‌نگ و تونڕه‌ويگ ديريد له وه‌رانوه‌ر روڵ ژنه‌يل و جه‌ختيش له‌وه كرد ك قه‌يران داعش ئه‌وه‌سه ناڵنێد وه‌ده‌س كه‌مى شماره‌ێ چه‌كداره‌يلێ.
ريكخرياگ داعش تويش په‌لاماره‌يل بته‌ويگ هاتگه له ڕقه له باكوور سورياو له وه‌رجه ئه‌وه‌يش له شار ته‌لعه‌فه‌ر له باكوور خوه‌رئاواێ عراق، ك يه‌يش كاريگه‌رێ داشت له‌بان داهاتى و ئه‌و خاكه‌يله ك له‌ژير ده‌سڵاتى بوێ و هويچ ئه‌گه‌ريگيش ناخاده روێ ئه‌را هاوردنوه‌ێ ئه‌و ناوچه‌يله ك له‌ده‌سيان داگه.
له‌ى باوه‌تيشه‌و، لودوفيكو كارلينو شيه‌وكه‌ر له به‌ش چه‌ودێرى ناكووكيه‌يل له كومپانياگه، له‌يوا وه خاستر زانێد په‌نا وه‌و چنه‌يله بووريه‌ێد هانه ناو داعش ئه‌را زانستن بارودوخ ئه‌و ريكخرياگ ترۆريستيه و باس له‌وه‌يش كرد ك تونڕه‌وه‌يل هه‌وڵ زاستن ئه‌و زه‌ره‌ده‌يليشه ئه‌يه‌ن ك هاته‌سه تويشيان.
زويتريش ريكخرياگ ترۆريستى داعش ژن له جيوه‌جيكردن په‌لاماره‌يل خوه‌يشكوشى هاوردياده كار، ئمجا ئه‌را نموونه: ژنه‌يل له جه‌نگ موسڵ نزيكه‌ێ 40% له په‌لاماره‌يل خوه‌يكوشى جيوه‌جى كرديان.
وه‌لێ ئه‌و شيه‌وكردنه ئاشكراێ يه‌يش كرد ك ديار نيه ئه‌گه‌ر ژنه‌يل خوه‌يان داواێ جيوه‌جيكردن ئه‌و كرده‌وه‌يل خوه‌يكوشيه بكه‌ن و بچنه ناو مه‌يدان جه‌نگ يا ريكخرياگ داعش وه زوور وه‌پيان بكا.
وه‌ل ئه‌وه‌يشا نيشانه‌ێ وجوود ستراتيجه‌ت تازه‌يگيش له‌لاێ داعش هه‌س ئه‌را مامڵه‌كردن وه‌ل ژنه‌يل، يه‌يش قسه‌وباس گووڤاريگه وه‌ناو "روميه" سه‌ر وه‌و ريكخرياگه له‌بان ئه‌نته‌رنێت و له‌باره‌ێ رۆڵ ژنه‌يل له وه‌خته‌يل ته‌نگ و گرينگى به‌شداريكردنيان له جه‌نگه‌يل.
داعش له سه‌ره‌تا پشت وه رۆڵه‌يل ئاسايى و ئاسانيگ ئه‌را ژنه‌يل به‌سا، يه‌يش بيجگه ئه‌وه‌گ جوور كۆيله‌يش ئه‌را چه‌كداره‌يلێ هاويانه كار وه‌ل بڕيگ كاره‌يل تر خراو.