شه‌فه‌ق نيوز/ له ده‌ورگرد شاروچكه‌ى باغۆز له خوه‌رهه‌ڵات سوريا، ژنه‌يل هاوار ئه‌كه‌ن "ئه‌ڵڵاهو ئه‌كبه‌ر" و"داعش مه‌ندگه‌و فراوان ئه‌دێ"و كه‌وشه‌يليان له‌وه‌رده‌م شاشه‌ێ كامێراى رووژنامه‌نويسه‌يل به‌رزه‌و ئه‌كه‌ن وه خراوداين وه‌پيان و هه‌ڕه‌شه‌ێ هه‌قه‌وكردن ئه‌كه وه فتوحات تازه‌يگ، ئه‌ويش دوياى چه‌ن سه‌عاتيگ دوياێ ده‌رچگنيان له دويا بنگه‌ى ريكخرياگ تيرۆريستى داعش.
له‌ناونى ئه‌و هه‌زاران كه‌سه ك له‌ى رووژه‌يل دوياخره له‌و دويا بنگه‌ى داعشه له نزيك مه‌رزه‌يل عراقى ده‌رچينه له ژن و مناڵ و شماره‌يگ له زه‌خمداره‌يل، دياره ك تونڕه‌ويل له‌و كه‌سه‌يله بوينه ك ئاخرين كه‌س بوينه ده‌رچينه له‌و شاروچكه‌ى گه‌مارۆ درياگه له‌لايه‌ن هيزه‌يل سوريا ديموكرات.
دياره ئه‌و ده‌رچگه‌يله له‌و شاروچكه شه‌كه‌ت و ورسگ و ناڕه‌حه‌تن له‌و واينه ك ره‌سيه خه‌لافه‌ته‌گه‌يان و وه‌ل ئه‌وه‌يشا فريه‌يگيش له‌ليان دگان وه ئه‌وه‌يا نانه‌ن ك ريكخرياگ تيرۆريستى داعش ته‌واو بويه.
هه‌ناى ك رووژنامه‌نويسه‌يل ره‌سينه لايان، ده‌يان ژنه داعشى ده‌سكردنه هاوار و بڕيگيش له‌ليان كه‌وشه‌يليان به‌رزه‌و كردن له‌وه‌رده‌م كاميراێ رووژنامه‌نويسه‌يل و بڕيگيش له‌ليان وه كوچگ وه‌شكيانه كاميرايله‌و و هاوار كرديان "ئه‌ڵڵاهو ئه‌كبه‌ر" و"داعش مه‌ندگه‌و فراوان ئه‌دێ".
ئه‌و ژنه‌يله كه‌فتوێنه‌ڕێ وه‌ره‌و لاى سه‌ياره‌يل ئه‌را جيوازكردنيان ئه‌را كه‌مپ ئه‌لهۆل له حه‌سه‌كه له باكوور خوه‌رهه‌ڵات سوريا، هيزه‌يل سورياى ديموكراتيش وه يه‌واشى په‌لاماره‌يلێ ئه‌نجام دا له‌ماوه‌ى رووژه‌يل گوزه‌يشت وه بوونه‌ى ده‌رچگن شماره‌يگ تازه له پياگ و ژن و مناڵه‌يل له باغۆز.
يه‌كيگ له‌و ژنه‌يله وتياد پيشڕه‌وێ ئه‌كه‌يم و خوين ئه‌ڕه‌سێده زرانى، وتيش: ئيمه ده‌رچيمنه، وه‌لێ فتوحات تازه‌يگ ها ڕييه‌و.
له‌يرا ژنه‌يل ناڕه‌زايه‌تى نيشان دان له‌بان ئه‌وه‌گ شه‌و له بياوان و له سه‌ردى مه‌ندنه‌و له‌وه‌خت ده‌رگنيان له باغۆز و ئاشكراى ئه‌وه‌يش كردن ك هيزه‌يل سه‌ربازى مۆبايل و گشت ئامێره‌يل ئه‌لكترۆنييگ له‌ليان زه‌فت كردنه.
بريگيش له‌ليان چه‌وه‌ڕێ كرديان سه‌ياره‌يل بكه‌فنه‌ڕێ و له‌ناونيانيش ئوم محه‌مه‌د(47ساڵان) ك عراقيه‌و خه‌ڵك ئه‌نبار بوێ و وت: چه‌وه‌ڕێ فه‌ره‌ج له خودا ئه‌كه‌يم.
له شوونيگ نزيكتر ژنه‌يليگ خه‌ريك نماز بوين و بڕيگيش قورئان خوه‌نديان، له‌ولايشه‌و مناڵيگ وه ده‌نگ نزميگه‌و گوورانييگ ريكخرياگ تيرۆريستى داعش وتياده‌و له‌وه‌خت ريكردن وه ل داڵگى.
له‌لايگ تريشه‌و ئه‌بو مه‌ريه‌م(28 ساڵان)ك خه‌ڵك ته‌رتووس خوه‌رئاواى سوريا بوێ وت: هووكار ده‌رچگن مه‌ردم شه‌كه‌تى بويه، باس له‌وه‌يش كرد ئه‌وانه‌گ هانه ناو شاروچكه‌ى باغۆز ئه‌خوازن ده‌رچن، وه‌لێ ترس ديرن.
ئه‌بو مه‌ريه‌م ئه‌وه ده‌رخست ك هاوسه‌ره‌گه‌ى و دووان له مناڵه‌يلى و سه‌ياره‌و دارايه‌گه‌ى له‌ده‌سداگه‌و ئه‌وه‌گ ئيسه ئه‌خوازێده‌ێ ئه‌وه‌سه بچێد وه‌ره‌و شوونيگ ئارام و وچان بيه‌ێد و له‌ورا نه‌مينێد.
ژنيگيش قورتاربوێ و سى ساڵان په‌نجه‌ى تومه‌ت ئه‌را مه‌سه‌له‌ى گه‌ناته‌كارى له‌ناو ريكخرياگ تيرۆريستى داعش دريژ كرد و وه‌رپرسيارێتى ئه‌و كاريشه خسته باان ئه‌بو به‌كر به‌غدادى سه‌ركرده‌ى داعش.
ئه‌و ژنه وت: جيوه‌جيكردن شه‌رعه‌يل خودايى وجوود ديرێد، وه‌لێ زوڵم و سته‌م سه‌ركرده‌يل گشت داراييگ وه تاڵان بردن و مه‌ردم پشتگووش خرياو خويانيش واين و ئيمه‌يش مه‌نديمنه‌و تا وه‌ختيگ گوله ره‌سيه ته‌وق سه‌رمان.
له ناوچه‌ى ئه‌لفه‌رز، له‌ناكاو كابرايگ نه‌تويه‌نستن زاڵ بدێده بان تويڕه‌يى خوه‌ى له‌وه‌رده‌م رووژنامه‌نويسه‌يل و هه‌رچه‌نى زه‌خمداريش بوێ، وه‌لێ وه‌ل ئه‌وه‌يشا وه هاواره‌و تومه‌تبار هاوپه‌يمان ناوده‌وڵه‌تى كرد ك وه فراوانى بوردومانيان كردياد له باغۆز و پشتگيرى له هيزه‌يل سورياى ديموكرات كردياد.
ئه‌و پياوه وت: من وه بوونه‌ى زه‌خمه‌گه‌مه‌و خوه‌م ته‌سليم كردمه، وه‌نا مه‌نديام، چوينكه من له سه‌ره‌تاوه وه‌ل ريكخرياگ ده‌وڵه‌ت ئسلامى بويمه‌و ئيسه ده‌رچيمه وه بوونه‌ى زه‌خمه‌گه‌م و چوينكه دى هويچ چشتيگ نه‌مه‌نده‌سه‌و.