شه‌فه‌ق نيوز/ رووژيگ له رووژان له ئاواييگ له ده‌يشت له‌نده‌ن، كنده حه‌داد مناڵه‌يلى ره‌سانه خوه‌ندنگاو گله‌وخوارد ئه‌را ماڵ و ده‌سكرده وه‌كارهاوردن لاپتۆپه‌گه‌ێ ئه‌را گه‌ردين له‌شوون راپۆرته‌يل رووژ له‌باره‌ى كوشيان مه‌ده‌نيه‌يل سوورى له ئاكام په‌لاماره‌يل ئه‌مريكى.
وه‌لێ دار له‌ولاو لاره‌و بوياد وه‌ل نه‌سيم له ده‌يشت و كنده حه‌داديش له ناو ته‌ماشاى شاشه‌ێ كومپيوته‌ر پڕ له وێنه‌ى ئه‌و مناڵه‌يل كوشياگ و ئه‌و ته‌رمه‌يل كه‌فتگه كردياد له‌ناو ويرانه‌ێ ماڵه‌يل.
وه‌گووره‌ى رووژنامه‌ێ واشنتۆن پۆست ئه‌مريكى، كنده باس كرد و وت: ده‌نگ نزم بوى و هه‌وڵ ئه‌وه دام نه‌ژنه‌فم، چوينكه له‌يوا كرد ئه‌و وێنه‌يله فيشتر بوونه مايه‌ى نگه‌رانى.
دو ساڵ وه‌سه‌ر چى ك كه‌نده‌ى(45 ساڵان)ده‌سكردوێده ئى رۆتين رووژانه جوور يه‌كيگ له شيه‌وكه‌ره‌يل مه‌جموعه‌ێ "ئێر وارز" نا قانجازكه‌ر ك 8 كه‌س گرتوێده خوه‌ى و ده‌سكره پرسياريگ ئاسايى ك ئه‌ويش: شماره‌ى ئه‌و مه‌ده‌نيه‌يله چه‌نيگه ك كوشيان له ئاكام په‌لاماره‌يل ئاسمانى ئه‌مريكى ئه‌را بان عراق و سوريا؟
سه‌رچه‌وه‌يل وه‌رده‌س ئه‌را ئى زانياريه‌يله له رووژنامه‌نويسه‌يل و نه‌ته‌وه‌يل يه‌كگرتگ و جه‌ماعه‌ت مافه‌يل ئاده‌ميزاد بوين ك چه‌وديرى مردگه‌يل مه‌ده‌نى كرديان له مه‌يدانه‌يل جه‌نگ، وه‌تايبه‌ت دوياى زنجيره كرده‌وه‌يليگ رفانن و سه‌ربڵاين رووژنامه‌نويسه‌يل و كارگه‌ره‌يل له بوار ده‌سميه‌ت له سوريا.
وه‌ى جووره ئير وارز ده‌سوه‌پيكرد ك كار كنده حه‌داد گرتوێده خوه‌ى له غورفه‌يگ ك له‌تى ژيا وه‌ل هه‌فت كه‌س تر له له‌نده‌ن و ئوردن و توركيا و به‌غداو ده‌سكرده گرده‌وكردن جواوه‌يل يه‌ك له‌شوون يه‌ك له‌ڕى وشكانن ده‌يان هه‌وار گرته ڤيديۆ و وێنه‌و بڵاوكرياگ فه‌يسبوك و حاسبه‌يل سه‌ربازى ئه‌مريكى و سه‌رچه‌وه‌يل تر له زانيارى له جه‌نگ ك فريه‌جار ئاده‌ميزاد له‌يوا هوير ئه‌كا دويره‌و شايسته‌ى زكركردن نيه.
كنده له سه‌ره‌تا ئحساس وه ئه‌وه كرد ك زانياريه‌يل فريه‌يگ هه‌ن تا ده‌س بكاده كاره‌گه‌ێ، وه‌لێ زوێ زانست ك مه‌سه‌له‌گه چه‌واشه‌سه‌و وت: كيشه‌گه له كه‌مى زانيارى نيه، به‌ڵكوو زانياريه‌يليگ فراوانيگ هه‌ن.
تائيسه‌يش ئاكام ئى مه‌سه‌له وه گووره‌ى راپۆرت ئير وارز: له فيشتر له هه‌زار رووژ له ئاكام ته‌قينه‌وه‌يل، وڵاته‌يل يه‌كگرتگ و هاوپه‌يمانه‌يلى فيشتر له 3200 مه‌ده‌نى كوشتنه، ك يه‌يش نۆ ئه‌وه‌نه‌ى حاڵه‌ته‌يل مردنه ك سوپاى ئه‌مريكى دگان وه 352 حاڵه‌ت مردن نا.
وه‌ل ئه‌وه‌يشا سوپاى ئه‌مريكى مه‌جموعه‌ى ئير وارز وه به‌شيگ له تيم دانه‌ێد و له‌ى باوه‌تيشه‌و مولازم مايكڵ غرايمز ك سه‌ركرده‌ى يه‌كه‌يگ له سوپاس وت: ئيمه ئه‌يانه وه به‌شيگ له تيم زانيم و فريه‌يگ له‌و باسه‌يله ئه‌ژنه‌فيم وه ته‌مامى ئاشكرا نين و يه‌يش له‌يوا ئه‌كا ئه‌ركه‌يلمان سه‌خته‌و بوون له‌وه‌ر ئه‌وه‌گ زانياريه‌يل دياريكرياگ نه‌يريم.
بيجگه ئه‌وه‌يش حه‌داد ئاماژه وه‌يه‌يش كرد ك جارجاريگيش بڕيگ وێنه‌يل رخه‌وبه‌ر نمايش كردياد له‌بان حاسبه‌گه‌ێ، وه‌لێ هه‌وڵ ئه‌وه دياد بڕه‌سێده ئاكام و شيه‌وكردن فيشتريگ.
حه‌داد وت: من له يه‌ك وه‌خت چه‌نها سه‌رچه‌وه واز ئه‌كه‌م، وه‌لێ له هه‌مان وه‌خت ماڵپه‌ڕ ئه‌لڕقه باس له سه‌ربڕين بيده‌نگ كردياد و ده‌نگ ئه‌لشه‌رق و حه‌قيقه‌ت ئه‌لڕقه‌و ئه‌لوفراتيش له‌و ماڵه‌په‌ڕه‌يله‌نه ك وه نهێنى هه‌واڵ بڵاو ئه‌كه‌ن له‌ناو خاكه‌يل داعش.
وه‌لێ وه‌ل ئه‌وه‌يشا حه‌داد مينه‌ێ راپۆرته‌يل له‌بان په‌لاماره‌يل رژيم ديمه‌شقيش كردياد وه‌ل كه‌مى ده‌رمان له درعا و ويرانكردن ده‌بابه‌يل سه‌ر وه داعش له رقه له‌لايه‌ن هيزه‌يل ئه‌مريكى و چه‌وێ كه‌فته راپۆرته‌يليگ له‌بان زه‌ره‌ده‌يليگ له ڕز مه‌ده‌نيه‌يل و له‌ى باوه‌ته‌و رووژنامه‌ى ئه‌لفورات پۆست ئه‌وه ده‌رخست ك ته‌ياره‌يل ئه‌مريكى په‌لامار نه‌خوه‌شخانه‌يگ مه‌يدتنى داگه له شار ئه‌لتبقه له دويرى 30 ميل له ڕقه و بويه‌سه هووكار كوشتن پزيشكيگ و چه‌ن كارمه‌نديگ و چه‌ن نه‌خوه‌شيگيش.
ئه‌و راپۆرته‌يله ره‌سانه‌ى ماڵپه‌ڕه‌يل تر، وه‌و خاتريشه ئاژانس سمارت نيوز ك يه‌كيگه له سه‌رچه‌وه‌يل خه‌وه‌رى و له‌لايه‌ن نويسه‌ريگه‌و له ئه‌ڵمانيا ئداره ئه‌كريه‌ێد و په‌يامنێره‌يليگ له رقه ديرێد ئه‌وه ده‌رخست ك په‌لامارداين نه‌خوه‌شخانه‌ى مه‌يدانى له ناوچه‌ێ دويه‌م له شاره‌گه روێداگه‌و پزيشكيگ و چه‌ن نه‌خوه‌شيگ كوشتگه.
له‌ى باوه‌تيشه‌و، راپۆرتيگ سه‌ربازى فه‌رمى ئه‌مريكى له هه‌مان رووژ باس له‌وه كرد ك سێ بنگه له ناوچه‌ى ئه‌لتبقه گرته‌سه ئامانج ك بنگه‌يگ كوشتار ناونى ريكخرياگ ترۆريستى داعش و هيزه‌يل كورد بويه وه پشتگيرى وڵاته‌يل يه‌كگرتگ.
حه‌داد بڵاوكرياگ عه‌ره‌بى ته‌رجومه كرد ئه‌را زووان ئنگليزى و جيوازى كرد ئه‌را وه‌سيقه‌يگ هاوبه‌ش ك خوه‌ى و هاوكاره‌يلى تويه‌نستيان زياترى بكه‌ن و شيه‌وكردن ئه‌راى بكه‌ن وه دريژايى رووژ.
ئمجا له ماوه‌ى فيشتر له دو ساڵ له كاركردن حه‌داد تويه‌نست وه‌ل كه‌سه‌يل تر له ئێر وارز ناو فيشتر له 1300 قوربانى له عراق و سوريا جه‌مه‌و بكا.
كريس وودز رووژنامه‌نويس ك ئير وارز دامه‌زران له پايز ساڵ 2014، وت: ئه‌وانه قوبانيه‌يل ناديار جه‌نگه‌يل گوزه‌يشت نين.
ئێر وارز مه‌زه‌نه‌ى ئه‌وه كرد ك وڵاته‌يل يه‌كگرتگ و هاوپه‌يمانه‌يلى فيشتر له 320 مه‌ده‌نى له سوريا كوشتنه له مانگ مارس، ك يه‌يش ئه‌كاده نزيكه‌ى هه‌فت ئه‌وه‌نه‌ى شماره‌ى ئه‌و كوشياگه‌يله ك ئامار كريان له مانگ فبرايه‌ر.
وودز باوه‌ڕى ئه‌وه‌سه ك ئى به‌رزه‌وبوينه ئاشكراى ئه‌وه ئه‌كا ك ئداره‌ى دوناڵد ترامپ سه‌رۆك ئه‌مريكى له‌و گرفته‌يله كه‌مه‌و كردگه ك مقه‌يه‌تى له مه‌ده‌نيه‌يل كردياد و وت: هه‌ناى ئه‌و راپۆرته‌يله ده‌ركريه‌ن و ئاماژه وه به‌رزه‌وبوين فريه‌يگ ئه‌كه‌ن له قوربانيه‌يل مه‌ده‌نى، بايه‌سه گووش بگريم.
حه‌داد دقه‌ت له‌بان شيه‌وكردنه‌يل پڕ دقه‌تيگ ئه‌كاو تاڕاده‌يگ ك وه‌رجه ماوه‌يگ خوه‌ى و هاوكاريگى وه‌ناو عه‌بدولوه‌هاب ته‌حان ك توێژه‌ريگ سوريه له ئێر وارز رووژيگ وه ته‌مامى ته‌رخان كردن ئه‌را به‌ڵگه‌يى كردن زنجيره په‌لاماره‌يليگ ئاسمانى له ئه‌لبوكه‌مال، ك ئاواييگه ئه‌كه‌فێده خوه‌رهه‌ڵات سوريا.
وه‌ختيگيش ك حه‌داد چه‌ويگ خشانه ئه‌و راپۆرته ك قه‌واره‌ى ره‌سيه 30 لاپه‌ڕه، ئه‌وه كه‌فته وه‌رچه‌وێ ك هاوكاره‌گه‌ى ڤيديۆيگ له شوون رويداگيگ زياى ئه‌راى كردگه له توێژينه‌وه يه‌كه‌مه‌گه‌ێ و نامه‌يگ عوزرخوازى ئه‌راى كلكرد و له‌تى وت: شايه‌ت چه‌وم نه‌يه‌سه‌ێ، دوباره‌يش كرته له فيديۆگه كرد ك وه تيه‌ريكى ده‌س وه‌پى كرد، وه‌لێ رووشنايى گڵۆپيگ له‌تى ديار كه‌فت له‌بان ويرانه‌يليگ و وه‌ختيگيش ده‌نگ ڤيديۆگه‌يش به‌رزه‌و كرد ده‌نگ پياويگ ده‌ركه‌فت و هاوار كردياد و كارگه‌ره‌يل وه‌هاناڕه‌سينيش هه‌وڵ قورتاركردنى ديان ئه‌ويش وتياد بڕه‌سنه پيم و ده‌نگه‌يليگيش ژنه‌فتياد هاوار كرديان بڕه‌س! بڕه‌س! بڕه‌س!.