وه‌گوره‌ێ ڕاپۆرتێگ لیژنه‌ێ كاروبار ده‌ره‌كی له‌په‌رله‌مان به‌ریتانیا، ك له‌ماڵپه‌ڕ فه‌رمی په‌رله‌مان ئه‌و وڵاته بڵاوكرياسه‌‌‌‌و ئه‌وه خرياسه‌‌ڕوی ك به‌ریتانیا، يا بايه‌سه هه‌ژمون خوه‌ێ له‌هه‌رێم كوردستان پته‌وبكه‌ێد، یا ئه‌و هه‌رێمه ڕاده‌س ئه‌وانه بكه‌ێد، ك دژ وه سیاسه‌ت‌و ڕايه‌يل به‌ریتانیان.
له راپۆرته‌گه‌ێ لیژنه‌ێ په‌یوه‌ندییه‌یل خارجی په‌رله‌مان به‌ریتانیا ئاماژه وه‌وه‌يش كرياس ك "سه‌روه‌خۆیی كوردستان" ئه‌گه‌رێگ جددییه و بايه‌سه به‌ریتانیا ئه‌ڕا ئی بابه‌ته ئاماده بوود.
كۆمیسیۆن په‌یوه‌ندییه‌یل ده‌ره‌كی په‌رله‌مان به‌ریتانیا له‌وباره‌وه ئعلان كرد: ك سه‌روه‌خۆیی هه‌رێم كورستان له ماوه‌ێگ مامناوه‌ند ئه‌گه‌رێگ وه‌هێزه و بايه‌سه په‌یوه‌ندی به‌ریتانیا و هه‌رێم كوردستان پێش بخريه‌ێد.
له راپۆرت "سیاسه‌ت به‌ریتانیا وه‌ل هه‌رێم كورستان" ك له‌لایه‌ن كۆمیسیۆن ناوبرياگه‌و ئاماده كرياس، جه‌خت له فراوانكردن په‌یوه‌ندییه‌يل و ته‌قالايه‌يل دیپلۆماسی به‌ریتانیا وه‌ل هه‌رێم كرياس.
سه‌رۆك كۆمسیۆنه‌گه، په‌رله‌مانتار پارت موحافزه‌كار، سێر ریچارد ئۆتاوه‌ی له‌باره‌ێ راپۆرته‌گه وت: "هه‌رێم كوردستان، دیموكراسییگ پێشكه‌فتگه، شوونێگ سه‌قامگیره له ناوچه‌ێگ ك سه‌قامگیری له‌تێ نییه، به‌هاێ ستراتیژی گرنگێگ دێرێ ئه‌ڕا ئه‌وه‌گ پيه‌ڵێگ دابنريه‌ێد وه‌ل هێزه‌یل تر ناوچه‌گه، قه‌ڵغانێگه له وه‌رانوه‌ر داعش و سه‌رچه‌وه‌ێ نه‌وت و گاز سرووشتییه، وه‌لێ له شوون رويداگه‌گه‌ێ ساڵ گوزه‌يشته‌وه، هه‌ستیار بويه و هه‌وه‌جه وه پشتگيری دووسه‌یلێگ جوور ئيمه ديرێ".
ئۆتاوه‌ی ئاشكرايشيه‌وكرد: ك بايه‌سه به‌ریتانیا په‌یوه‌ندییه‌یل خوه‌ێ وه‌ل كوردستان وه‌ره‌و نواتر بوه‌ێد و وت: "يه وه ئه‌نجامداين بازرگانی و كلكردن كه‌سه‌یل زیاتره ئه‌ڕا راوێژكاری ده‌سه‌ڵات، هاووه‌خت ئيمه‌يش هه‌وه‌جه وه پێشنیار و راوێژكاری پسپۆره‌يل ئی ناوچه ديريم له به‌ره‌نگاربوينه‌وه‌ێ داعش له عێراق و سووریا، وه‌شێوه‌ێگ گشتی بايه‌سه دیپلۆماته‌گانمان كار زیاتر بكه‌ن له‌ی ناوچه".
له راپۆرته‌گه هاتگه "ك سه‌روه‌خۆیی هه‌رێم كوردستان ئه‌گه‌رێگ جددیه له وه‌ختێگ تێبینی له‌سه‌ر تواناێ خوه‌ێ وه‌ڕێه‌وبردن و تواناێ ئابووری ناوچه‌گه بكريه‌ێت، داواێ ئی سه‌روه‌خۆییشه چشتێگ راسییه، مه‌زنه‌ێ ئه‌وه نيه‌كه‌یم ك سه‌روه‌خۆییه‌گه له ماوه‌ێ كۆڵێگ سه‌ربگرێ وه‌لێ له واده‌ێ ناوه‌ند ئی ئه‌گه‌ره وجوود دێرێ، بايه‌د حكوومه‌ت به‌ریتانیا ئه‌ڕا ئی پرسه ئاماده بوود" هاووه‌خت راپۆرته‌گه جه‌خت له دژایه‌تی ئيران و توركیا وه‌رانوه‌ر وه سه‌روه‌خۆیی كوردستان كردگه.
راپۆرته‌گه ئاماژه‌يش وه‌وه دا ك ئيسه بايه‌د حكوومه‌ت به‌ریتانیا په‌یام پشتگيری له به‌ره‌نگاربوينه‌وه‌ێ كورد و عه‌ره‌ب عێراق دژ وه داعش بيه‌ێد، هاووه‌خت راپۆرته‌گه وه‌شانازییه‌و باس به‌ره‌نگاربوينه‌وه‌ێ پێشمه‌رگه دژ وه داعش كردگه‌و وه‌ئه‌رێنییه‌و تماشاێ بڕیار پشتگيری و پشتیوانی به‌ریتانیا ئه‌ڕا پێشمه‌رگه كرياس.
راپۆرته‌گه پاداگری كه‌ێد ك بايه‌د وه ئه‌رێنییه‌و جوواو داواێ هه‌ماهه‌نگی حكوومه‌ت هه‌رێم كوردستان له بواره‌یل وه‌رگری، په‌روه‌رده، بازرگانی، رووشنهویری و هه‌واڵگری بكريه‌ێد.
وه‌چه‌واشه‌ێ ئه‌وه شايه‌د حكوومه‌ت هه‌رێم داواێ پشتيوانی و ده‌سمه‌يه‌ت له شوونێگ تر بكه‌ێد، هاووه‌خت به‌ریتانیا بايه‌د ده‌سمه‌يه‌تده‌ر بوود له‌و كاره‌يله ك بايه‌سه ئه‌نجام بدريه‌ن له بواره‌یل ماف مرۆڤ و پێشخستن دیموكراسی له هه‌رێم كوردستان.
له‌ڕاپۆرته‌گه داوا له‌ده‌سه‌ڵات به‌ریتانیا كرياس، پشتيوانی له‌هێزه‌یل پێشمه‌رگه‌ێ كوردستان بكا، له‌ڕوی چه‌ك‌و كه‌ره‌سه‌ێ سه‌ربازی‌‌و مه‌شقكردن، وه‌مه‌رجێگ خاسسازی له‌هێز پێشمه‌رگه بكريه‌ێد، له‌ڕاپۆرته‌گه داواێ لاوردن وه‌ربه‌سه‌يل وه‌رده‌م گه‌شته‌يل ئاسمانی ناونی له‌نده‌ن‌و هه‌ولێر كرياس، وه‌جوورێگ ئاست بازرگانی بڕه‌سێده به‌رزترين ئاست و په‌یوه‌ندیه‌یل ناونی هه‌ردولايش بڕه‌سێده ئاستێگ فره پێشكه‌فتگ.
لیژنه‌ێ كاروبار خارجی په‌رله‌مان به‌ریتانیا، پرۆسه‌یل ئه‌نفال له‌ڕاپۆرته‌گه وه‌جینۆساید ناسانگه، سه‌ره‌ڕاێ ئه‌وه‌گ حكوومه‌ت ئه‌و وڵاته وه‌شێوه‌ێگ فه‌رمی، ئه‌و تاوان ڕژيم به‌عسه وه‌جینۆساید نه‌ناسانگه.
ا. ج