شه‌فه‌ق نيوز/ له كه‌سه‌يليگه‌و ك وه‌رده‌وامن له گوزه‌ران له‌ناونى وێرانه‌ێ جه‌نگه‌يل و ناكووكيه‌يل تا مناڵه‌يل له زه‌لگاوه‌يل ك هويچ چشتيگ نه‌يرن له كرده‌وه بيجگه سوارى به‌له‌م له‌وه‌ڕانن گاميشه‌يل. هه‌ر وه‌و خاتريشه مه‌عه‌ن حه‌بيب وێنه‌گريگ رووژنامه‌نويسه له‌رێ پرووژه‌يگى ژيان راسكانى له نيشتمانه‌گه‌ى گرته‌سه وه‌رچه‌و له‌ڕێ چه‌وه‌يل كامێراگه‌ى و ئويشێد هه‌رچه‌نى كيشه‌و گرفته‌يل فريه‌يگ هه‌ن، وه‌لێ وه‌ل ئه‌وه‌يشا ژيان وجوود ديرێد.
ئشق مه‌عه‌ن حه‌بيب ئه‌را وێنه له‌وه‌ختيگه‌و بويه ك ته‌مه‌نى 14 ساڵان بويه، هه‌ر له‌وه‌ر ئه‌وه‌يش بڕيار اداگه تايبه‌تمه‌ند بدێ له به‌ش وێنه‌گرتن به‌ڵگه‌يى و رووژنامه‌گه‌رێ له په‌يمانگاى وێنگه‌رى نيويۆرك وه ئامانج گرده‌وگردن له‌ناونى پيشه‌گه‌ى و مه‌يله خوديه‌گه‌ێ.
دوياى ئه‌وه‌گ ك چيه‌سه ناو جه‌هان وێنه‌گرێ به‌ڵگه‌يى و رووژنامه‌گه‌رێ، حه‌بيب بڕيار ئه‌وه داگه عراق به‌ڵگه‌يى بكا وه وێنه وه بوونه‌ى ئه‌وه‌گ ژينگه‌يگ نه‌خته ئه‌را روايه‌ته‌يل و باوه‌ته‌يل فريه‌يگ، ك وڵاتيگه پڕ له رووشنهويرى و ئايين و تايفه‌يل جياجيا جوور ئه‌وه‌گ ئه‌را CNN باسى كردگه.
وه‌گووره‌ى ئه‌و پرووژه ك وه‌رجه دو ساڵ ده‌سوه‌پيكرد وه‌ناونيشان "چه‌ويگ له‌بان عراق" ديد نوڕستن شه‌خسى خوه‌ى ده‌ركه‌فتگه ئه‌را ژيانيگ راسكانى ك له هه‌مان وه‌خت هه‌م ته‌نگى و هه‌م خوه‌شيه.
حه‌بيب پرووژه‌گه‌ێ به‌شه‌و كردگه ئه‌را قوناغه‌يل جياجيا وه بوونه‌ى ئه‌وه‌گ وڵاته‌گه ها له‌ژير بارودوخيگ ناچارێ و رێگرى له‌لى ئه‌كا بڕه‌سێده بڕيگ ناوچه‌و ئى قوناغه‌يليشه پيكهاتنه له به‌غدا، زه‌لگاوه‌يل عراقى و ئاوايى به‌رنون.
ئمجا وه بوونه‌ى مه‌ينه‌تيه‌يل پايته‌خت عراقيه‌و له بڕيگ له جه‌نگه‌يل و ته‌قينه‌وه‌يل، هه‌ر كه‌سيگ له به‌غدا بڕيگ حكايه‌ت و داستان ديرێد ك چه‌واشه‌ى مه‌ندنه‌وه‌س له ژيان.
له‌و كه‌سه‌يليشه يه‌كيگه بيوه‌ژن له ته‌مه‌ن په‌نجا ساڵى وه‌ناو خه‌زرا عه‌بوڵڵا ك له‌ساى تون وتيژى تايفى هاوسه‌ره‌گه‌ى له‌ساڵ 2006 له‌ده‌سداگه ك هه‌رچه‌نى تويش روێداگ هات له وه‌ختيگ ك هيزه‌يل ئه‌مريكى هاتنه ناو عراق له 2003 و چه‌و راسى له‌ده‌سداو چه‌و پلاستيكى ئه‌راى دانريا.
ئه‌و وێنه‌گر عراقيه وێنه‌ى مه‌ردم زه‌لگاوه‌يليش گرتگه ك باوه‌ڕ وه ئاينده نيرن، ئه‌ويش وه بوونه‌ى وشكه‌وبوين ناوچه‌يليان و كه‌مبوين ئاو له‌ئام وه‌ربه‌سه‌يل ئيرانى و توركى له‌بان هه‌ر ده‌رياچه‌ى دجله‌و فورات، بيجكه ئه‌و پيسيه ك كاريگه‌رێ له‌بان ئاژه‌يليه‌يل و گژ و گياو ته‌نانه‌ت مه‌ردمه‌گه‌يش ديرێد.
گرته‌يل وێنه‌يلێ بيتاوانى مناڵه‌يل زه‌لگاوه‌يل له‌تى ده‌ركه‌فێد ك هويچ چشتيگ شك ناوه‌ن بيجه له سوارى به‌له‌م و له‌وه‌ڕانن گاميش وه بوونه‌ى نه‌وين خوه‌ندنگا له ناوچه‌يليان.
ئمجا له يه‌كيگ له حاڵه‌ته‌يل ك مه‌ندگه له‌ياد حه‌بيب له‌وه‌خت وه‌سه‌ربردن وه‌خته‌يلى له عراق، ئه‌ويش بڕيگ له ماڵه‌يله له نزيگ سه‌رچه‌وه‌ى نه‌فتى ئه‌حده‌ب وه دويرى 90 كيلۆمه‌تر له باشوور به‌غدا ك ناڵنێد وه ده‌س نه‌فت پرشه‌كردن و غازه‌يل ژه‌هراويه‌و ك چه‌نه‌ها نه‌خوه‌شى له‌ناونى مه‌ردمه‌گه په‌يا كردگه بيجگه ئه‌و مناڵه‌يل تازه ك ئه‌يه‌نه دونيا وه كه‌مئه‌ندامى و نه‌خوه‌شى.
ئى پرووژه رێ وه ئه‌وه داگه ك ئى وێنه‌گر عراقيه چه‌وێ بكه‌فێده چه‌ن شوونيگ ك هويچ وه‌ختيگ سه‌ردانيان نه‌كردگه له وڵاته‌گه‌ێ و له ئاينده‌يش حه‌بيب مه‌يل ئه‌وه ديرێد له‌نوو سه‌ردان عراق بكاو ئيسه‌يش گه‌ردێده شوون پشتگيرى ريكخرياگه‌يل په‌يوه‌نديدار وه مافه‌يل ئاده‌ميزاد ئه‌را ته‌واوكردن پرووژه‌يلێ.
