شه‌فه‌ق نيوز/ په‌رده له‌بان دروسكردن "كه‌شتييگ قورئانى" له ته‌ڵا دروسكرياگ لادريا ئه‌را داناينى له ناو مه‌زارگه‌ێ ئيمام حسێن(س . خ)له كه‌ربه‌لا.
نوێنه‌ر عه‌لى خامه‌نه‌يى رابه‌ر ئيرانى له‌شار قوم په‌رده له‌بان ئه‌و كه‌شتى قورئانيه لاورد ك جوور ته‌وه‌ڕك و خزمه‌تيگ ئه‌را دوانزه ئيمامه‌يل شيعه دروس كرياگه‌و ئى كه‌شتيه ناو گشت ئه‌و ئيمامه‌يله وه‌ته‌ڵاى ساق له‌قه‌يه‌و نوريسرياگه له‌وه‌ر ئه‌وه‌گ جيواز بكريه‌ێد ئه‌را مه‌زارگه‌ێ ئيمام حسێن له عراق.
ئيران وه فه‌رمى ئاشكراى بودجه‌و ئه‌و خه‌رجه نه‌كرد ك ته‌رخان كرياس ئه‌را دروسكردن ئى كه‌شتى له ته‌ڵا دروسكرياگه، ك له‌وه‌خت لاوردن په‌رده‌يش له‌بانى كاردانه‌وه‌ى فريه‌يگ تويڕه‌ێ ئيرانيه‌يل له‌بانى كه‌فته‌و له‌بان ماڵپه‌ڕه‌يل په‌يوه‌ندى كۆمه‌ڵايه‌تى.
چالاكوانه‌يل ئيرانى جوور ئه‌وه‌ك ماڵپه‌ڕ "عه‌ره‌بى 21" باسى كرد، وتن: وڵاته‌گه‌مان هيمان ناڕه‌زايه‌تى و خوه‌ينيشانداين وه‌خوه‌يه‌و دوينێد وه بوونه‌ى بار ئابوورى و له‌جياى ئه‌وه‌گ چاره‌سه‌ر ئى قه‌يرانه بكريه‌ێد ئى هه‌مگه پويل فريه‌ى هاووڵاتيه‌يل ئيرانيه له‌بان ئى پرووژه‌يله خه‌رج كريه‌ێد ك يه‌يش له ئسلام نه‌ويه‌و ملله‌ت ئيرانى هويچ قانجازيگ له‌لى وه‌رناگرێد.
هووكاره‌يل ره‌سانن ئيرانى باس له‌وه كردن ك دريژى ئى كه‌شتى له ته‌ڵا دروسكرياگه سێ مه‌تره‌و پانيه‌گه‌يشى يه‌ك مه‌تره.
ئيرانيه‌يل خه‌رجكردن پويل له‌بان ئى كه‌شتيه وه به‌دخه‌رجى له ماڵ ملله‌ت تاريف كردن وه‌ناو ئيمامه‌يل شيعه‌و ئه‌هلولبه‌يت له‌وه‌ختيگ ك داوكاريه‌يل ئابوورى و ژيان و گوزران ملله‌ت فه‌رامووش كرياگه، وه‌گووره‌ى قسه‌يل خوه‌يان.
له‌ى باوه‌تيشه‌و، رووژنامه‌ى سه‌با ئازه‌ر بيگ ئيرانى وت: مناڵه‌يل له ئيران له‌ناو زبڵدانه‌يل گه‌ردنه شوون ئه‌وه‌گ چشتيگ له‌تى بويننه‌وه‌و له‌ولايشه‌و په‌رده له‌بان كه‌شتييگ له ته‌ڵا دروسكرياگ لاوريه‌ێد وه‌بى ئه‌وه‌گ وه‌رپرسه‌يل وژادنيان ژان بكاو باس له‌وه‌يش ئه‌كه‌ن ك ده‌نگ ملله‌ت ئيرانى له خوه‌ينشانداينه‌يل ژنه‌فتنه.
شادى مورادى ك هاووڵاتييگ ئيرانيه له‌بان توێته‌ر قسه له‌باره‌ى ئى كه‌شتيه كرد و وت: كارگه‌ره‌يل كومپانياى هه‌فت ته‌په ئه‌را نه‌ى شه‌كه‌ر ماوه‌ى شه‌ش مانگه مووچه‌يليان وه‌رنه‌گرتنه‌و بانكه‌يل ئيرانييش پويل مه‌ردم بردنه تا خوارفه وه ته‌ڵا وه‌پى بڕازننه‌و.
وه‌ل ئه‌وه‌يشا مورادى ته‌عليقيش له‌بان پياويگ ئايينى ئيران دا ك ته‌حقيق له دروسكردن ئه‌و كه‌شتيه ئه‌كا ك وه قورئان نه‌قشه كرياگه‌و وت: وه دقه‌ته‌و ته‌ماشاى ئى قورئانه بكه‌و ئايه‌ته‌يل فريه‌يگ دوينێد نواگيرى له‌ليدان ئه‌كا له دروسكردن قورئان و كه‌شتى وه ته‌ڵا، وه‌لێ هه‌ناى ك ئه‌قڵ ديارى ناميه‌نێد رووح ئه‌كه‌فێده‌و عه‌زاو.
