لە ڕاپۆرتە ئەمریکییەگە کە ئاژانس شەفەق نیوز ئەڵگەردانی کرد؛ دەسنشان کەێد کە شێخ یاسر عۆدە لە ماوەی ساڵەیل گوزەشتە لە سۆشیال میدیا ناوبانگی دەرکرد، وە رەخنەگانییەو لە گەندەڵی لە عراق و لوبنان، هەرلیوا رەخنە لە پەنابردن وە تونوتیژی لە دژ گروپە ئۆپۆزسیۆنەیل و لایەنەیل لوبنانی و عراقی گرد.
شێخ عودە لە دیداریگ وەگەرد ئاژانس ئەمریکا راگەیانیە، ئەگەر ژیانییش بکەێدە قوربانی واز نیارێد.
لە راپۆرتەگە هاتیە؛ وتارەیل عۆدە دوو رووژ دویای ئەوە هات کە بەشیگ لە ناو “ئەنجومەن باڵای ئیسلامی شیعە لە لوبنان” کە وە باڵاترین دەسەڵات ئایینی شیعە لە لوبنان دانریەێد، بەیاننامەیگ بڵاو کرد کە ناو ١٥ پیاو ئایینی دیرن خود عۆدەیش هاناویان، کە وە قسەی ئەو شایستەی پشکەشکردن رینمایی ئایینی نیین. بەڵام ئیجا ئەنجومەن باڵای ئیسلامی شیعە بەیاننامەیگ بڵاو کرد و هەڵوێست وەڕێوبەرایەتی گشتی دەعوەی ئایینی رەت کرد، وە لەوەرچەوگردن ئەوە کە نوێنەرایەتی هەڵوێست ئەنجومەن نیەکەێد.
لە ناو دیداریگ وەگەردی لە ماڵە سادەگەی لە گەڕەکیگ باشوور بەیروت، عۆدە وت: "من دان وە ئەنجومەنی باڵای ئیسلامی شیعەدا نیەکەم"، وتیش: "گەندەڵی ها لای ئەو سیاسەتمەدارەیلە کە لەلایەن دەسەڵاتە ئایینیەیل مقیەتی کریانە"، لە دەسنیشانکردن ئاشکرایگ ئەرا ئەنجومەنەگە.
لە ڕاپۆرتەگە باس ئەوە کریایە کە یەکیگ لە نوونترین قسەیل عۆدە کە لە سۆشیال میدیا بڵاو بویە و سیاسەتمەدارەیل لوبنان و عراق تویڕە کردیە، لە وتاریگ بویە کە لە کۆتایی مانگ گوزەشتە پیشکەشی کرد، لەناوی وتیە: "هەرکەسیگ وەرگری لە پەرلەمانتاریگ یا وەزیریگ یا سەرکردەیگ لە لوبنان و عراق بکەێد، ئەگەر وە یەک قسەیش بویە، ئەوە درووزن و گەندەڵ و هاوبەشە وەگەردیان."
لە راپۆرتەگە لە زوان عۆدە نویسایە: "ئی قسە و باسە لە عراق بڵاو بویە و سیاسەتمەدارەیل و قازانجخوازەیل تویڕە بوینە، وەتایبەت لەناو شیعە"، سەرسامی نشان دەێد کە ئەڵاجەویە چوین ئەو وڵات دەوڵەمەن نەفتیە ژیرخانی کاولە لە وەختیگیش فرە لە مەردمەگەی هانە نەداری و کەمدەسی.
وەگورەی ڕاپۆرتەگە؛ عۆدە رەخنە لە بڕیگ لە سەرکردەی ئایینی لە حەوزەی نەجەف گرد، یەیش بەشیگ لە کەسایەتییە کاریگەرەیل ئەو شارە تویڕە کرد کە یەکیگ لە پیرووزترین مەزارگەی شیعە هاناوی.
هەرلیوا لە ڕاپۆرتەگە لە زار وەرپرسیگ عراقی لە بەغدا وت: بڕیگ لە ئاخونەیل نەجەف داوا کردنە ریگری لە شێخ عۆدە بکریەێد لە پیشکەشکردن وتار گشتی.
لە زوان وەرپرسیگتر بڵاو کردیە کە بەشیگ لە ئەندامەیل باڵای ئەو هیز سەر وە ئیرانە و بڕیگ لە سیاسەتمەدارەیل لەڕی نوێنەر حزبولڵا لە عراق شێخ محمد کەوسەرانی سکاڵا ئەرا بەیروت کل کردنە و داوا کردنە عۆدە پەراویز بخریەێد.
لە راپۆرتەگە باس ئەوە کرد کە حزبولڵا ئاشکرا کردیە کە هویچ دەسوەردانیگ لەلای خوەیەو لە باوەت عۆدە نییە، وتییشە؛ ئەنجومەن باڵای ئیسلامی شیعە لە لوبنان خوەی وەرپرسیارە.
بەڵام لە راپۆرتەگە دەسنشان وەوە کریایە کە عۆدە باس لە زوورەیل گەورەیگ لەبانی کەێد کە لە لوبنان لەلایەن حزبوڵلا و بزووتنەوەی ئەمەل کە لەلایەن نەبیە بڕی سەرۆک پەرلەمانەو سەرپەرشتی کریەێد.
وباس بەو دوو لایەنە وە "دووانەی شیعە" کردیە، وتیش: "ریگری لە هەر رەخنەیگ کەن".
راپۆرتەگە لە درویژەی قسەیلی وت؛ شێخ عۆدە پشتیوانی ئەو ناڕەزایەتیەیلە کرد کە لە ساڵ ٢٠١٩ لە عراق و لوبنان دژوە گەندەڵی هەڵسیا. لە راپۆرتەگە لە زوان عۆدە نویسان "ئەو دووانەی شیعە خوەشیان لەمن نیەتێد، چوینکە من توومەتباریان کەم وە بەد وەڕێوەبردن و شکست و بەشداریکردن لە گەندەڵی لە وڵات وە واژووکردن گشت ئەو یاسایلە کە پارەی گشتی لەناو دانە"، لە دەسنیشانکردن ئەرا ئەو دەیان ساڵەی گەندەڵی و بەد وەڕێوەبردنە کە لوبنان خستە گەنترین قەیران ئابووری لە میژوو نوو.
شێخ عۆدە ئەو رەخنەیلە لەی دواییە کەفتیەسە بانی، جویر بەیاننامەی وەڕێوەبەرایەتی گشتی دەعوەی لە ئایینی، وە "کوشتنی هیمایی کە کوشتن بی گولە" دادەی قەڵەم.
هەناێ پرسیار لە شێخ عۆدە کریا کە ئایا رخی لەبان ژیان خوەی چوود، وت؛ رخی لە مردن نیەچوود و وتیش "ئامادەم باجەگەی بیەم، بەڵام زیان وە خیزانەگەم نەڕەسنن، لەوە زیاتر نیەخوازم".