رووژنامه‌گه له باوه‌تيگی باس له‌وه كرد ك سه‌رله‌نوو به‌رلين جه‌خت له نزيكی و بته‌وی په‌يوه‌نديه‌يل خوه‌ی وه‌ل پاريس كردگه‌و هه‌ر وه‌و خاتريشه ئه‌نجيلا ميركڵ راوێژكار ئه‌ڵمانی واده داسه فرانسوا هۆلاند سه‌رۆك رووسی ئی يه‌كه‌يل سه‌ربازيه ره‌وانه بكا له‌وه‌ر جواودانه‌وه‌ی داواكاريه‌گه‌ی ئه‌را روی وه‌ڕوی بوينه‌وه‌ی داعش ك ١٢٠٠ سه‌رباز و ئه‌فسه‌ر ره‌وانه‌ی سوريا بكا، ك يه‌يش ئه‌را يه‌كه‌مجاره له جه‌نگ جه‌هانی يه‌كه‌مه‌و تا ئيسه ك ئه‌ڵمانيا له‌يوا هيزيگ له چه‌كداره‌يلی ئه‌را ده‌يشت مه‌رزه‌يلی ره‌وانه بكا، وه‌لێ ئايا هيزه‌يل ئه‌ڵمانی ئه‌تويه‌نێد جيوه‌جی ئه‌ه‌و ئه‌ركه‌يله بكا ك وه‌پی سپارياگه؟
جه‌نراڵ فولكه‌ر فيكير سه‌رپه‌شيار گشتی هيزه‌يل چه‌كدار ئه‌ڵمانی ك تا وه‌خته‌يل نزيكيگ سه‌رۆك ده‌سه‌ی ئه‌ركان گشتی بوی، وت: ئه‌ڵمانيا خوازياره يه‌كه‌يل سه‌ربازی ره‌وانه‌ی سوريا بكا ك شماره‌يان ١٢٠٠ سه‌ربازه ئه‌را به‌شداری له جه‌نگ دژ ريكخرياگ ترۆيستی داعش، ئی برياره‌يشه له‌لايه‌ن ئه‌نجيلا ميركڵ راوێژكار ئه‌ڵمانيه‌ه‌و دريا ئه‌را جواودانه‌وه‌ی هۆلاند له پاريس له رووژ ١٣ی ته‌شرين دويه‌م گوزه‌يشت.
ئی شماره ئه‌را بۆندسفير(هيزه‌يل چه‌كدار ئه‌ڵمانی)شماره‌يگ په‌يمانه‌ييه، ئمجا راسه ك ئه‌ڵمانيا زويتر يه‌كه‌يليگ له هيزه‌يلی كلكرد ئه‌را ئه‌فغانستان له چوارچيوه‌ی ناتۆ ك شماره‌يان ٥٠٠٠ كه‌س بوی ئه‌را دژايه‌تی تاڵيبان، وه‌لێ وه‌شيوه‌يگ وه‌جبه‌يل بويچگ ره‌وانه‌يان كرد ك دوياخر شماره‌يان ره‌سيه په‌نج هه‌زار سه‌رباز.
فيكير هه‌ميش وت: هيزه‌يل ئه‌ڵمانی به‌شداری له په‌لاماره‌يل جه‌نگی ناكا دژ ترۆريسته‌يل له سوريا، به‌ڵكوو ئه‌ركه‌يليان ئه‌وه‌سه هه‌وه‌جه‌يل خواست ئه‌را ته‌ياره‌يل چه‌وديركه‌ر و كه‌شتيه‌يل جه‌نگی دابين بكا، ك هه‌ر وه‌و خاتريشه مه‌سه‌له‌ی به‌شداری نه‌كردنی له په‌لاماره‌يل جه‌نگی جی گومانه.
ئاشكرايشه ك ئه‌ڵمانيا ٤ – ٦ ته‌ياره‌ی چه‌وديريكه‌ر"تۆرنادۆ" ره‌وانه‌ی سوريا ئه‌كا ك ئه‌ركه‌يليان ئه‌وه‌سه بنگه‌ی ترۆريسته‌يل ده‌سنيشان بكاو حاڵ حازريش قسه‌و گفتگوو ئه‌كريه‌ێد وه‌ل توركياو ئوردن له‌باوه‌ت وه‌كارهاوردن بنگه‌ی ئه‌نجيرليك ئاسمانی له توركياو بنگه‌ی ئاسمانی له عه‌مان.
وه‌ل ئه‌وه‌يشا كه‌شتيه‌يل جه‌نگی ئه‌ڵمانييش به‌شداری ئی ئه‌ركه ئه‌كه‌ن شان وه‌شان شارل ديغۆ هه‌ڵگر ته‌ياره‌يل فره‌نسی له ده‌ريای چه‌رمگ ناوڕاس و كه‌شتيه‌يل تر.
دی وه قه‌وڵ فيكير ئه‌وه ده‌ركه‌فت ك ته‌ياره‌وانه‌يل ئه‌ڵمانی به‌شداری ناكه‌ن له چواچيوه‌ی ئه‌و هاوپه‌يمانێتيه ك وڵاته‌يل يه‌كگرتگ سه‌ركردايه‌تيی ئه‌كا له په‌لاماره‌يليان ئه‌را بان بنگه‌ی ترۆريسته‌يل و دويريش نيه ك يه‌كه‌يل ئه‌ڵمانی نه‌ڕه‌سنه توركيا و ئوردن، چوينكه ئی كاره ره‌زامه‌نی په‌رله‌مان ئه‌خوازێد، وه‌ل ئه‌وه‌يشا ياخيبوين له ڕزه‌يل لاينگره‌يل ميركڵيش وه دوير نازانريه‌ێد، چوينكه بڕيار كلكردن يه‌كه‌يل سه‌ربازی و كه‌ره‌سه‌يل سه‌ربازی ئه‌را مه‌ترسيدارترين شوونه‌يل جه‌هان بويه‌سه جی سه‌رسوڕمه‌نين كومه‌ڵگای ئه‌ڵمانی.
له هه‌مان وه‌خت وزاره‌ت وه‌رگری ئه‌ڵمانييش ئوميده‌واره بريار په‌رله‌مان بزانێد له وه‌رجه كووتايی ئمساڵ تا بتويه‌نێد ئی هيزه ره‌وانه بكا له كووتايی مانگ ديسه‌مبه‌ر/ كانوون يه‌كه‌م ئيسه ئه‌را خوه‌رهه‌ڵات ناوين.
بيجگه ئه‌وه‌يش هوير وڕايگ دژ كرده‌وه‌يل ميركڵيش هه‌س له‌ناو په‌رله‌مان، بيجگه ئه‌و جه‌نراڵه‌يله ك شكايه‌ت له‌ده‌س كه‌می ته‌ميلكردن هيزه‌يل چه‌كدار ئه‌كه‌ن.
